༼ཨ་ཤོ་ཀའི་མདོ་༽ཡི་བོད་འགྱུར་མར་མཇལ་བའི་དྲིན་གཟོ་དད་པའི་མེ་ཏོག

 ༼ཨ་ཤོ་ཀའི་མདོ།༽ འབྲི་གུང་སྐྱབས་མགོན་ཆེ་ཚང་རིན་པོ་ཆེ་དཀོན་མཆོག་བསྟན་འཛིན་འཕྲིན་ལས་ལྷུན་གྲུབ་ཀྱིས་བསྒྱུར།།

གཅན བཟོད་རྒྱམ། 

༼ཨ་ཤོ་ཀའི་མདོ་༽  ཞེས་པའི་དེབ་འདི་༧འབྲི་གུང་སྐྱབས་མགོན་ཆེ་ཚང་རིན་པོ་ཆེས་རྒྱའི་ཡིག་ཚང་ནས་ཕྱུངས་ཏེ་བོད་བསྒྱུར་མཛད་པའི་ནང་བསྟན་ཆོས་ཀྱི་བསྟན་བཅོས་ཤིག་ཡིན་ཞིང་། བམ་པོ་བཅུ་དང་བམ་པོ་བདུན་པ་ནས་བཅུ་པའི་བར་དུ་བམ་པོ་རེར་ནང་གསེས་མདོ་ཕྲན་ནམ་སྡེ་ཚན་ཆུང་བ་མང་ཞིང་། བམ་པོ་བདུན་པར་ནང་གསེས་བཞི་དང་། བམ་པོ་བརྒྱད་པར་ནང་གསེས་གཉིས། དགུ་པར་ནང་གསེས་བཅུ་གཉིས། བཅུ་པར་ནང་གསེས་བཅུ་བདུན་དང་། མཇུག་ཏུ་ཟུར་བཀོད་རྨ་བྱ་རྒྱལ་རྒྱུད་ཀྱི་རྒྱལ་པོའི་ལོ་ཚིགས་བཅས་ཁྱོན་ཤོག་ངོས་༣༦༣ ཙམ་འདུག 

མདོ་འདིའི་མ་དཔེ་ནི་རྒྱ་ཡིག་ཡིན་པ་དང་བོད་འགྱུར་གྱི་དེབ་འདིའི་ནང་དུའང་རྒྱ་ཡིག་བོད་ཡིག་གཉིས་ཤན་སྦྱར་གྱི་ཚུལ་དུ་ཤོག་ངོས་རྒྱབ་མདུན་བྱས་ཏེ་བཀོད་འདུག་ཅིང་ཚིག་དོན་ཟབ་ཅིང་བསྡུས་ཆེ་ནའང་ཀློག་བདེ་ཞིང་གོ་སླ་བ་ཞིག་འདུག

མདོ་འདི་བོད་སྒྱུར་ནི་ལོ་མང་གོང་ནས་གནང་ཞིང་མདོ་འདིའི་ཚན་པའམ་དུམ་བུ་རེ་བོད་འགྱུར་གནང་བ་སྲོང་བཙན་ཚངས་དབྱངས་དུས་དེབ་འདོན་ཐེངས་པར་བཀོད་འདུག་པ་གཤམ་གྱི་ལེའུ་སོ་སོའི་ངོ་སྤྲོད་སྐབས་ཞབས་མཆན་དུ་བཀོད་ཡོད།

དྷརྨ་ཨ་ཤོ་ཀའམ་ཆོས་རྒྱལ་མྱ་ངན་མེད་ཞུ་བ་ནི་ས་སྟེང་འདིིར་ཤེས་རིག་ཅུང་ལྡན་པའི་མི་ཞིག་ཡིན་ཚེ་མི་ཤེས་མཁན་མེད་ཅིང་། ཁོང་ཤེས་པར་ཡང་རྒྱུ་མཚན་གཉིས་ཏེ། གཅིག་ནི་ཁོང་ཧ་ཅང་གཏུམ་གཅོད་ཆེ་ཞིང་མི་བསད་ཁྲག་སྦྱོར་ཡ་ང་བ་བྱེད་མཁན་ཞིག་ཡིན་པ་དང་། གཞན་ཞིག་ནི་སྟོན་པ་བཅོམ་ལྡན་འདས་ཀྱི་ནང་པའི་བསྟན་པ་རིན་པོ་ཆེ་ས་སྟེང་དུ་ཁྱབ་ཅིང་དར་བར་གནང་བས་ཡིན། 

ཁོང་ནི་ཡེ་ཤུ་འདས་ལོའི་གོང་གི་ལོ་༣༠༤ ནས་༢༣༢ བར་ཙམ་གྱི་མི་ཡིན་ཞིང་། གཞོན་དུས་རྒྱ་གར་ཤར་ཕྱོགས་ཀྱི་ཡུལ་ཀ་ལིང་ཀ་ཞེས་པར་དྲག་པོས་དཔུང་དྲངས་ཏེ་མི་སྲོག་གྲངས་མེད་འཕྲོག་ཅིང་། ཡུལ་བཅོམ་རྒྱུ་འཕྲོག་བརྗོད་ལས་འདས་པ་བྱས་པས་ཁོང་ལ་བདུད་རྒྱལ་མྱ་ངན་མེད་ཅེས་གྲགས། 

ཁོང་གིས་ཡུལ་ཀ་ལིང་ཀའི་མི་མངས་པོ་བསད་ཅིང་རྒྱལ་ཁམས་གནུབས་རྗེས་སེམས་མི་སྐྱིད་པ་དང་ཡིད་མི་བདེ་བ་ཆེན་པོ་བྱུང་རྐྱེན། དེའི་དུས་ན་སངས་རྒྱས་ཀྱི་རྗེས་འཇུག་དགེ་སློང་རྒྱ་མཚོ་ཞུ་བ་ཞིག་ཡོད་པ་དེའི་ཞི་དུལ་དང་ཆོས་ཀྱི་བསླབ་བྱས་ཁོང་གི་བློ་ཁ་ཆོས་ལ་བསྒྱུར་ཅིང་། སྔོན་ཀྱི་བྱས་ཉེས་འདགས་ཐབས་སུ་ཆོས་ཀྱི་བསླབ་བྱར་སྦྱང་བརྩོན་དང་འབྲེལ་ནས་ཉམས་ལེན་བྱས་ཤིང་། རིམ་པས་འཛམ་གླིང་གི་ཡུལ་ཕྱོགས་གང་སར་ཆོས་ཀྱི་ཕོ་ཉ་བཏང་སྟེ་ནང་བསྟན་དར་སྤེལ་དང་། ནང་བསྟན་དར་སྤེལ་གནང་བའི་ཡུལ་དག་ཏུ་ཀུན་སྤྱོད་བཟང་པོའི་མི་ཆོས་ཀྱི་བརྗོད་དོན་མཚོན་པའི་རྡོ་ཡི་ཀ་བ་བསླངས་ཤིང་བྲག་ལ་ཡི་གེ་བརྐོས། ཆོས་དང་མཐུན་པའི་ཡུལ་ཁྲིམས་སྣ་ཚོགས་བཅོས། ཆུ་དཀོན་སར་ཡུ་ཆུ་དྲངས། མཆོད་རྟེན་བྱེ་བ་གསར་དུ་གཞེངས། ཆོས་སྤེལ་བའི་དགེ་སློང་དང་ཕོ་ཉ་བརྒྱུད་ཆོས་ཀྱི་དཔེ་ཆ་སྣ་ཚོགས་ཕྱོགས་མཚམས་ཀུན་ཏུ་དྲངས་ཏེ་ཡུལ་སོ་སོར་དར་ཞིང་རྒྱས་པར་བྱས། ཆོས་ཕྱོགས་ཀྱི་ཕྱག་ལས་རྒྱ་ཆེར་གནང་སྟེ་ས་སྟེང་གི་རྒྱན་དུ་གྱུར་བ་གནང་། 

ཡུལ་ཀ་ལིང་ཀར་དམག་དྲངས་ཏེ་སྡུག་ལས་འཚབ་ཆེན་བྱས་པའི་སྐོར་ཅུང་ཟད་ཅིག་བདག་གི་གྲོགས་པོ་སྐུ་ཞབས་བློ་བཟང་དཔལ་ལྡན་ལགས་ཀྱིས་དེ་སྔོན་བླ་མཁར་ཞེས་པའི་དྲ་ཚོམས་སུ་གཏམ་བཤད་གནང་བ་དེར་གསལ་ཞིང་། རྒྱ་གར་གྱི་གློག་བརྙན་འཁྲབ་སྟོོན་པ་གྲགས་ཅན་བྱ་རོག་ཁའན་གྱིས་འཁྲབ་པའི་གློག་བརྙན་ཨ་ཤོ་ཀ་ཞེས་པའང་ཡུལ་ཀ་ལིང་ཀར་དམག་དྲངས་པའི་ལོ་རྒྱུས་བརྗོད་བྱར་བྱས་པ་དང་ཕྱིས་སུ་ཆོས་ལ་ཕྱོགས་པའི་སྐོར་ཡིན། 

རྒྱལ་པོ་མྱ་ངན་མེད་འདི་བློ་ཁ་ཆོས་ལ་ཕྱོགས་པའི་ཐད་ནས་བཤད་ཚུལ་གཉིས་འདུག་སྟེ། གཅིག་ནི་མདོ་འདིའི་བོད་འགྱུར་གྱི་གླེང་བརྗོད་ནས་མདོ་ཚིགས་རྣམས་སུ་གསལ་ཞིང་། དེ་ཡང་ཐོག་མར་ནང་པའི་དགེ་སློང་རྒྱ་མཚོ་ཞུ་བར་བརྟེན་ནས་སེམས་འགྱུར་བ་དང་། དེ་ནས་སྟོན་པའི་གཏད་རབས་བཞི་པ་འཕགས་པ་ཉེར་སྦས་བསྟེན་ནས་ཆོས་ཀྱི་བསླབ་བྱ་མང་དུ་སྦྱངས་པ། འདིར་ངོ་སྤྲོད་བྱ་རྒྱུའི་མདོ་འདི་ལས་ཀྱང་ཁོང་གི་བློ་ཁ་ཆོས་ལ་ཕྱོགས་པ་སྟོན་པ་བཅོམ་ལྡན་འདས་ཀྱི་གཏད་རབས་བཞི་བ་འཕགས་པ་ཉེར་སྦས་སམ་དགྲ་བཅོམ་པ་ཉེར་སྦས་ཀྱིས་ཆོས་བསྟན་པ་དང་། སྟོན་པ་སངས་རྒྱས་ཀྱིས་ཆོས་ཀྱི་འཁོར་ལོ་བསྐོར་བའི་ཡུལ་གཙོ་བོ་ངོ་སྤྲོད་གནང་བ་བཅས་ཀྱིས། རྒྱལ་པོ་མྱ་ངན་མེད་ཀྱིས་གནས་ཆེན་ཁག་དེ་དག་ཏུ་རྡོ་ཡི་ཀ་བ་བསླངས། ཡུལ་ཕྱོགས་གང་སར་ཆོས་ཀྱི་ཕོ་ཉ་མངགས་ཏེ་ནང་བསྟན་དར་རྒྱས་ཀྱི་ཕྱག་ལས་རྒྱ་ཆེར་མཛད་པ་སོགས་ཆོས་རྒྱལ་མྱ་ངན་མེད་དང་འབྲེལ་བའི་ལོ་རྒྱུས་དང་། མཛད་རྗེས་མཐར་མཐོར་མང་པོ་བོད་ཀྱི་ཡིག་ཚང་དུ་མང་ཞིང་། སྤྱིར་ “ རྒྱལ་པོ་ཨ་ཤོ་ཀའི་རྟོགས་བརྗོད་ཆ་ཚང་བ་ཞིག་དེང་བར་བསྒྱུར་མེད་ཅིང་། མཁས་དབང་ཏཱ་ར་ན་ཐའི་རྒྱ་གར་ཆོས་འབྱུང་ནང་། ༼ས་དབང་བཟང་པོས་བྱས་པའི་གཏམ་རྒྱུད་ཀྱི་ཡི་གེའི་ནང་། འདིའི་ལོ་རྒྱུས་གོ་རིམ་སྒྲིགས་པ་ཙམ་སྣང་ལ། ཞེས་དང་། ༼གསེར་ཕུལ་ཕུལ་བའི་གཏམ་རྒྱུད་ཅི་རིགས་པ་དཔག་བསམ་འཁྲི་ཤིང་ན་ཡང་ཡོད་དོ།༽ གསུངས། ཆོས་རྒྱལ་མྱ་ངན་མེད་ཀྱི་རྟོགས་བརྗོད་ལ། ཁྱོན་བམ་པོ་བདུན་ཡོད་པའི་བམ་པོ་གཉིས་པར། ༼མྱ་ངན་མེད་བཏུལ་བའི་རྟགས་བརྗོད་དང་། བམ་པོ་གསུམ་པ་ཀུ་ན་ལའི་རྟོགས་བརྗོད་༽གཉིས་བོད་དུ་བསྒྱུར། གསུངས་པ་ལྟར། མྱ་ངན་མེད་ཀྱི་རྟོགས་བརྗོད་ཆ་ཚང་དེང་བར་བོད་ཡིག་ནང་བསྒྱུར་ཐུབ་མེད།༽ ” ཅེས་འབྲི་གུང་སྐྱབས་མགོན་གྱི་མདོ་འདིའི་སྔོན་གླེང་དུ་གསལ་བ་ལྟར་ན། དེ་སྔོན་མྱ་ངན་མེད་ཀྱི་སྐོར་བོད་ཡིག་ནང་ཡོད་པ་རྣམས་ནི་ཆ་ཚང་བ་མིན་པ་དང་། རེ་གཉིས་ཙམ་ཡིན་པ་གོང་གི་ཏཱ་ར་ན་ཐའི་ལུང་འདི་ལས་ཤེས་ཐུབ། མྱ་ངན་མེད་ཀྱི་ཆོས་དར་སྤེལ་སྐབས་སུ་བཞེངས་པའི་རྡོ་རིངས་ཡི་གེ་རྣམས་ལས་རེ་ཟུང་མ་གཏོགས་རཀ་ར་རིན་པོ་ཆེས་བོད་བསྒྱུར་གནང་འདུག་ཅིང་། དེར་ཡང་ནང་བསྟན་དར་སྤེལ་དང་འབྲེལ་བའི་ཡུལ་སོ་སོ་དང་། ནང་དོན་ཆོས་དང་ཡུལ་ཁྲིམས་གཙོར་བསྟན་གྱི་བརྗོད་བྱ་ཅན་ཡིན་འདུག མཁས་དབང་དགེ་འདུན་ཆོས་འཕེལ་གྱི་གསུང་རྩོམ་དུའང་ཨ་ཤོ་ཀའི་རྡོ་ཡིག་རེ་གཉིས་འགྱུར་ཡོད། 

གཞན་ཡང་ཨཱ་ཙརྱ་ཐུབ་བསྟན་བྱམས་པས་བསྒྱུར་པའི་[ཆོས་རྒྱལ་མྱ་ངན་མེད་ཀྱི་ལོ་རྒྱུས་]ཉུང་བསྡུས་༡༩༩༡ ལོར་བོད་ཀྱི་དཔེ་མཛོད་ཁང་ནས་བཏོན་ཡོད་པ་དེ་ནི་མྱ་ངན་མེད་ཀྱི་ལོ་རྒྱུས་ཡིན་ཅིང་། མཁྱེན་བརྩེའི་དབང་པོའི་གསུང་འབུམ་པོད་གསུམ་པར་མྱ་ངན་མེད་ཀྱི་ལོ་རྒྱུས་རོབ་ཙམ་འདུག 

ད་རེ་༧འབྲི་གུང་སྐྱབས་མགོན་ཆེ་ཚང་རིན་པོ་ཆེ་མཆོག་གིས་རྒྱའི་ཡིག་ཚང་དུ་ཡོད་པའི་མྱ་ངན་མེད་ཀྱི་མདོ་ཆ་ཚང་བ་བོད་བསྒྱུར་གནང་བར་སྙིང་དབུས་ནས་རིན་པོ་ཆེར་བཀའ་དྲིན་ཆེ་ཞུ།

སྟོན་པའི་གཏད་རབས་བཞི་པ་འཕགས་པ་ཉེར་སྦས་ནི་སློབ་མ་འདུལ་སྦྱོང་ལ་མཆོག་ཏུ་གྱུར་པ་ཞིག་ཡིན་ཚུལ་མདོ་འདིའི་བོད་འགྱུར་གླེང་གཞིར་གསལ་ཞིང་། དེ་ལྟར་ན། ཆོས་རྒྱལ་མྱ་ངན་མེད་དེ་ཡང་སློབ་མ་འདུལ་སྦྱོང་ལ་མཆོག་ཏུ་མཁས་པའི་འཕགས་པ་ཉེར་སྦས་ཀྱི་ཐབས་མཁས་ཐུགས་རྗེས་བཏུལ་པ་ཡིན་འདུག། 

མདོ་འདིའི་བོད་འགྱུར་དུ་བམ་པོའི་མཚན་བྱང་རྣམས་ཀྱི་མཇུག་ཏུ་༼རྟེན་འབྲེལ་༽ཞེས་པའི་ཚིག་འདི་བཀོད་པ་དང་། དེ་ཡང་ “ ནང་དོན་གྱི་ཆ་ནས་རྟེན་འབྲེལ་གནད་ལ་དབང་སྒྱུར་ཡོད་པའི་ཁྱད་ཆོས་དང་།”  སྔོན་སྟོན་པས་ཆོས་ཀྱི་འཁོར་ལོ་བསྐོར་བའི་གནས་ཆེན་ཁག་ཏུ་ཕེབས་ནས་འཕགས་པ་ཉེར་སྦས་ཀྱིས་མྱ་ངན་མེད་ལ་སངས་རྒྱས་ཀྱི་རྣམ་ཐར་དང་འབྲེལ་ནས་གནས་བཤད་དང་སངས་རྒྱས་ཀྱི་ཆོས་ཅི་གསུང་བསྟན་ཏེ་ཆོས་བསྟན། དེ་ལྟར་མྱ་ངན་མེད་དེ་ཆོས་ལ་བཀོད་པའི་ཚུལ་འཕགས་པ་ཉེར་སྦས་ཀྱིས་གསུང་ཡིན་ཞིང་། དེ་ལྟར་ན་གསུང་འདི་ལ་མདོ་ཞེས་པའི་མཚན་གྱིས་བསྙད་པ་དང་། གཞན་དུ་ནའང་ཨ་ཤོ་ཀའི་རྟོགས་བརྗོད་བམ་པོ་བདུན་པ་སོགས་མཚན་བྱང་ཡང་ཡོད་འདུག་པ་བཅས་མདོར་བསྡུས་སུའོ།།

མདོ་འདིའི་ལོ་ཙཱ་བ་གླེང་བ།

མདོ་འདི་ནི་༧འབྲི་གུང་སྐྱབས་མགོན་ཆེ་ཚང་རིན་པོ་ཆེ་དཀོན་མཆོག་འཕྲིན་ལས་ལྷུན་གྲུབ་མཆོག་གིས་ཙི་ནའི་ཡིག་ཚང་ལས་བོད་གངས་ཅན་པའི་སྐད་དུ་ཕབ་སྒྱུར་གནང་བ་ཞིག་ཡིན། ལོ་ཙཱ་བ་ཁོང་ནི་བོད་གངས་ཅན་པའི་ཆོས་བརྒྱུད་ཆེན་པོ་བཞིའི་ཡ་གྱལ་༧དཔལ་བཀའ་བརྒྱུད་པའི་ཆོས་བརྒྱུད་ལས་འབྲི་གུང་བཀའ་བརྒྱུད་ཀྱི་བསྟན་པའི་སྲོག་ཤིང་འབྲི་གུང་ཆེ་ཚང་རིན་པོ་ཆེ་ཡིན་ཞིང་། དམ་པ་ཁོང་ནི་ཡབ་ཚ་རོང་བདུད་འདུལ་རྣམ་རྒྱལ་དང་ཡུམ་རགས་ཁ་ཤག་གི་སྲས་མོ་དབྱངས་ཅན་སྒྲོལ་དཀར་གཉིས་ཀྱིས་སྲས་སུ་བོད་ཀྱི་རྒྱལ་ས་ལྷ་སར་ཚ་རོང་གཟིམ་ཤག་ཏུ་སྤྱི་ལོ་༡༩༤༦ ལོར་སྐུ་འཁྲུངས་ཤིང་། དགུང་ལོ་གསུམ་པར་༧གོང་ས་༧སྐྱབས་མགོན་ཆེན་པོའི་ཕྱག་རྟགས་དགོངས་དོན་བཞིན་༧སྐྱབས་མགོན་ཆེ་ཚང་ཞི་བའི་བློ་གྲོས་ཀྱི་ཡང་སྲིད་འཁྲུལ་བྲལ་དུ་ངོས་འཛིན་གསོལ་རས་གནང་། ༡༩༥༡ ལོར་༧་གོང་ས་༧ སྐྱབས་མགོན་ཆེན་པོས་དྲུང་ནས་གཙུག་ཕུད་ཕུལ། ༡༩༥༩ ལོར་རྒྱའི་དོ་དམ་བཀག་ཉེར་འོག་༡༩༦༠ ལོར་སློབ་ཆུང་གཉིས་པར་བཞུགས། ༡༩༦༦ ལོར་རིག་གསར་ཚུགས། སློབ་མཚམས་བཞག་སྟེ་ངལ་རྩོལ་ལ་བཅུག ས་ཞིང་འདེབས་པ་དང་མེ་ཤིང་སྒྲུབ་པ། གསང་སྤྱོད་ལུད་འདོན་སོགས་དཀའ་སྡུག་ཚད་མེད་ལ་བཀོལ། དགུང་གྲངས་ཉེར་དགུ་བ་༡༩༧༥ ལོར་ཆུ་ཤུར་ཆུས་སུ་ལས་བགོས་བྱས། ཟླ་རེར་གླ་ཕོགས་སྒོར་ཉེར་བརྒྱད་ལས་མེད། དཀའ་སྡུག་ཚད་མེད་མྱོང་བཞིན་ཡོད་ནའད་ཐུགས་སུ་དཔལ་རྒྱལ་བ་འབྲི་གུང་བའི་བསྟན་པ་སླར་གསོའི་ཐུགས་སྟོབས་འཁུངས་ཏེ་རྒྱ་གར་དུ་བྲོས་བྱོལ་གནང་རྒྱུའི་ཐུགས་ཐག་བཅད། ༡༩༧༥ ལོའི་ཟླ་༤ པའི་ཚེས་༢༨ ཉིན་ལྷ་ས་ནས་ཐོན། དིང་རི་དང་ཁམ་བུ་གངས་ལ་ཞེས་པར་འབྱོར་སྐབས་མི་གཞན་གཉིས་འགྲོ་བ་དང་མཉམས་ཕེབས་དང་། དེ་ནས་སྐུ་རྐྱང་དུ་ཕེབས་ཏེ་བདུན་གཅིག་ཙམ་ནས་བལ་ཡུལ་རྒྱལ་ས་ཀ་ཐ་མན་གྲུ་ཞེས་སྐད་ཆ་འདྲི་བཞིན་དུ་བལ་ཡུལ་ནང་འབྱོར། འདིའི་སྐོར་ཁོང་གི་མ་ཡུམ་གྱི་ཕྱག་དེབ་ཏུ་འདི་ལྟར་གསལ། སྐུ་ན་ཕྲ་བའི་དུས་བོད་ས་རྒྱས་བཙན་འཛིན་སྐབས་དབང་མེད་འཁྱམ་པོར་གྱུར་ཅིང་། ངལ་རྩོལ་ལས་ཀར་ཞུགས། མཐར་རྒྱ་གར་དུ་སྐྱབས་བཅོལ་གནང་ཞིང་། ཨ་རིར་ཁ་ཟ་ཁང་གི་ལས་ཀ་གནང་བ་སོགས་དཀའ་སྡུག་ཚད་མེད་ཚུལ་བཞེས་(ཚ་རོང་དབྱངས་ཅན་སྒྲོལ་དཀར། ༢༠༠༦)  ཤིང་མཐར་ཉག་ཕྲ་བའི་བོད་བསྟན་སྲིད་མི་རིགས་ཀྱི་ཞབས་འདེགས་གནང་སླད་དུ་ཕྱིར་རྒྱ་གར་དུ་ཕེབས་ཏེ་བཤད་སྒྲུབ་ཀྱི་བསྟན་པ་འཛིན་པའི་གནས་གཞི་གསར་འཛུགས་ཀྱིས་སློབ་འབངས་བསྐྱངས་དང་སྐྱོང་མུས་དང་། འཛམ་གླིང་དུ་གྲགས་པ་འབར་པའི་ནང་བསྟན་ཤུལ་གནས་ཆེན་པོ་མཉན་ཡོལ་དུ་རྒྱལ་སྤྱིའི་ནང་བསྟན་སློབ་སྦྱོང་ལྟེ་གནས་ཁང་གསར་བཞེངས་གནང། བོད་ཕྱི་ནང་གཉིས་དང་འཛམ་གླིང་ཡུལ་གྲུ་ཁག ལྷག་པར་དུ་ཧི་མ་ཡ་ལའི་རི་རྒྱུད་ཀྱི་དད་ལྡན་མང་ཚོགས་ལ་ཐུགས་བརྩེ་བ་ཆེན་པོས་གཟིགས་སྐྱོང་གནངས་དང་གནང་མུས་དང་། ལ་དྭགས་ཀྱི་ཡུལ་གྲུ་མང་པོར་ཡུལ་མི་ལ་སྐུལ་མ་གནང་སྟེ། སྡོང་ཕྲུག་འདེབས་འཛུགས་ཀྱིས་མར་ཡུལ་སྔོ་ལྗང་ཅན་དུ་སྒྱུར་བའི་ཕྱག་ལས་ལོ་མང་གནང་། འཛམ་གླིང་རང་བཞིན་གྱི་ནང་བསྟན་པ་ཀུན་གྱིས་ཐུགས་འདོད་བཞིན་ལོ་ལྟར་མཉན་ཡོལ་གྱི་ཆོས་ཀྱི་དུས་སྟོན་ཚོགས་སྐབས་སུའང་ཆོས་ཀྱི་ཚིགས་སུ་བཅད་པའི་མདོའི་ཆོས་འཁོར་བསྐོར་གནང་བ་སོགས་ཐུགས་རྒྱ་ཆེན་པོའི་མཛད་པ་སྐྱོང་གནང་གིན་ཡོད། ཁོང་གི་མཛད་པ་གཞན་གྱི་ཆ་ཙམ་གླེང་ན། ༧འབྲི་གུང་སྐྱབས་མགོན་རིན་པོ་ཆེ་མཆོག་ནི་ནང་པའི་རྒྱལ་བསྟན་སྤྱི་དང་བྱེ་བྲག་འཛམ་གླིང་གི་དེང་རབས་གསར་པའི་རིག་གནས་སོགས་ལ་མཁྱེན་རྒྱ་རབ་ཏུ་ཡངས་ཤིང་། ཁྱད་པར་དུ་རང་རེའི་གངས་ཅན་བོད་ཀྱི་ཆོས་རིག་ལོ་རྒྱུས་སོགས་ལའང་མཁྱེན་པའི་རྒྱ་ཆེ་ཞིང་། ཐུགས་སྟོབས་ཆེ་བ་ཞིག་ཡིན་འདུག།

ཁོང་གིས་དེ་སྔོན་ཡང་༼བོད་བཙན་པོའི་རྒྱལ་རབས་༽ ཞེས་པ་ལོ་ངོ་ཆིག་སྟོང་སྔོན་གྱི་ཏུན་ཧོང་བྲག་ཕུག་ལས་ཐོན་པའི་བོད་ཀྱི་ལོ་རྒྱུས་ཡིག་ཆ་སྣ་ཚོགས་དང་། བོད་བཙན་པོ་རྒྱལ་བློན་ཀྱི་ལྡེབས་རིས། མདོ་སྨད་གཏེར་ལམ་ནས་རྙེད་པའི་བཙན་པོའི་སྐབས་ཀྱི་བང་སོ་ལས་བོད་བཙན་པོའི་སྐབས་ཀྱི་རི་མོ། བོད་ཀྱི་ས་ཁུལ་གང་ས་ནས་རྙེད་པའི་གནའ་བོའི་རྡོ་ཆས་དང་རྫ་ཆས་སོགས་ལ་ཐུགས་ཞིབ་གནང་སྟེ་གནའ་བོའི་བོད་མི་རིགས་ཀྱི་འཚོ་གནས་འགྲེལ་བརྗོད། བོད་བཙན་པོའི་སྐབས་ཀྱི་ཡིག་རྙིང་མང་པོ་ཕྱོགས་བསྡུས་ཀྱིས་བཙན་པོའི་སྐབས་ཀྱི་རྒྱལ་རབས་ཆ་ཚང་ལ་ཡིག་ཆས་གཙིགས་ཆེ་བ། དོན་གྱི་གནད་གཅུན་ལ་ཚིག་གི་དག་ཐོན་པ། སྡེབ་སྦྱོར་མཛེས་ལ་ནང་དོན་འདུས་ཆེ་བ། སྔ་ན་མེད་པའི་བཙན་པོའི་རྒྱལ་རབས་ཁ་ངོ་འཕྲོད་སླ་བ་ཞིག་རྩོམ་སྒྲིག་མཛད་པ་ནི་སྒང་བ་བོད་ཀྱི་ཤེས་རིག་ལ་དགའ་བ་དང་དུང་བ་སློབ་པ་དཔྱོད་པའི་སྐྱེས་བུ་རྣམས་ཀྱི་ཡིད་ཀྱི་གསོས་སུ་གནང་ཡོད་ཅིང་། ཀུན་གྱིས་དགའ་བསུ་དང་བསྔགས་བརྗོད་ཀྱི་མེ་ཏོག་འབུལ་བཞིན་ཡོད། ད་དུང་བོད་ཀྱི་ཆོས་རིག་སྲུང་སྐྱོབ་དང་སྦྱོང་སྤྱོད་དར་སྤེལ་སླད་དུ་རྡེ་ར་རྡུན་དུ་སྲོང་བཙན་དཔེ་མཛོད་ཁང་ཆེན་མོ་གསར་འཛུགས་མཛད། 

ད་དུང་ཁོང་ནི་སྐད་རིགས་དང་ཡིག་རིགས་འདྲ་མིན་ལ་མཁས་ཤིང་ཁྱད་པར་དུ་སྐད་རིགས་སྣ་མང་ལ་མཁྱེན་པ་ཆེ། ད་རེ་ཡང་སྐྱེས་ཆེན་ཁོང་གིས་རྒྱའི་ཡིག་ཚངས་ན་བཞུགས་པའི་ཆོས་རྒྱལ་༼ ཨ་ཤོ་ཀའི་མདོ་༽ ཞེས་པའི་བསྟན་བཅོས་ཆེན་པོ་འདི་བོད་གངས་ཅན་གྱི་སྐད་དུ་བསྒྱུར་ཅིང་། དེ་ཡང་རྒྱའི་ཡི་གེ་དང་བོད་ཡིག་གཉིས་ཤོག་ངོས་ཉིན་སྲིབ་ཏུ་འཁོད་པ་དང་། ལྟ་བདེ་ལ་མ་ཡིག་དང་བསྡུར་སླ་བ། ཚིག་དོན་གང་ཐད་ནས་ཕུལ་དུ་བྱུང་བ་ཞིག་བྱུང་འདུག་པར་ཡིད་རབ་ཏུ་སྤྲོ་ཞིང་། འབྲི་གུང་༧སྐྱབས་མགོན་རིན་པོ་ཆེ་ཁོང་ལ་སྐུ་དྲིན་ཤིན་ཏུ་ནས་ཆེ་ཞེས་ཞུ་འདོད། 

མདོ་འདིའི་བོད་བསྒྱུར་གྱི་ཁྱད་ཆོས་ཅུང་ཙམ་གླེང་བ།

སྤྱིར་གུས་པའི་ཆེད་སྦྱོང་རྩོམ་རིག་མིན་སྟབས། མདོ་འདིའི་རྩོམ་སྟངས་སོགས་ཀྱི་ཐད་ནས་ཅང་ཞུ་སྤོབས་ཆེར་མེད་ནའང་། ༧འབྲི་གུང་སྐྱབས་མགོན་རིན་པོ་ཆེ་(འདི་ནས་མར་ལོ་ཙཱ་བ་ཞེས་འབྲི་ཆོག་པ་ཞུ་) བོད་རང་གི་གནའ་བོའི་རྩོམ་སྟངས་ལྟར་སྒྱུར་ཡོད་ཅིང་། དེ་ཡང་བོད་ཀྱི་རྩོམ་རིག་གཞུང་ལུགས་འཆད་པའི་སྐབས་སུ་བོད་བཙན་པོའི་སྐབས་ཀྱི་རྩོམ་སྟངས་ཞེས་དབྱེ་སྲོལ་ཡོད་པ་དང་། དེ་ཡང་དབྱེ་བ་དེའི་ནང་དུ་བཙན་པོའི་སྐབས་ཀྱི་མགུར་རྩོམ་ལུང་དྲངས་ཏེ་མགུར་རྩོམ་གྱི་ཁྱད་ཆོས་དག་བརྗོད་གཞིར་བཤད་སྲོལ་ཡོད། དེས་ན་འདིར་ཡང་ལོ་ཙཱ་བས་བོད་བཙན་པོའི་སྐབས་ཀྱི་རྩོམ་སྟངས་སྤྱད་དེ་མདོ་འདི་བོད་སྒྱུར་གནང་ཡོད་འདུག་ཅིང་། བོད་འགྱུར་བཀའ་བསྟན་ལས་མདོ་རྒྱུད་ཀྱི་བསྟན་བཅས་གང་ནའང་འདི་ལྟར་བོད་བཙན་པོའི་སྐབས་ཀྱི་མགུར་རྩོམ་གྱི་རྩོམ་སྟངས་ལྟར་སྒྱུར་བ་ཧ་ལམ་མེད་སྙམ་ཞིང་གུས་པས་ད་བར་དུ་གཅིག་ཀྱང་མཇལ་མ་མྱོང་། ཡང་མ་མཐོང་ཕྱིར་ན་མེད་པ་མིན་པས་བོད་ཀྱི་ཡིག་ཚང་ནི་ཧ་ཅང་རྒྱ་ཆེ་ལ་གཏིང་ཟབ་པས་རེ་ཟུང་ཡོད་ཀྱང་སྲིད། 

གུས་པས་མདོ་འདི་ཐོག་མར་མཇལ་སྐབས་མདུན་ཤོག་གི་ཚོས་གཞི་དང་དེའི་སྟེང་གི་མཚན་བྱང་བོད་དབྱིན་རྒྱ་གསུམ་ཤན་སྦྱར། སྒྱུར་སྒྲིག་དང་ལོ་ཙཱ་བའི་མཚན་བྱང་། དེ་ནས་མདུན་ཤོག་ནང་མའི་ཡིག་ཆུང་། དཀར་ཆག གླེང་གཞི་དང་དེའི་འཕྲོར་ཤོག་ངོས་༡༣ པ་ནས་མདོ་འདིའི་བམ་པོ་དང་པོའི་དབུ་ཚུགས། བམ་པོ་དང་པོ་ནི་རྟེན་འབྲེལ་ལས་སྐྱེས་པའི་ལེའུ་དང་པོ་ཞེས་པ་ཡིན་ཞིང་། “སངས་རྒྱས་བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་བྱ་ཀ་ལཎ་ཌ་ཀ་Kalandaka ཀུན་དགའ་ར་བ་ venuvana ན། སྔ་དྲོའི་དུས་ཀྱི་ཆ་ལ་ཤམ་ཐབས་དང་ཆོས་གོས་བགོས་ཤིང་ལྷུང་བཟེད་ཐོགས་ཏེ། དགེ་སློང་གི་དགེ་འདུན་གྱི་ཚོགས་དང་བཅས་པས་ཡོངས་སུ་བསྐོར་ནས། རྒྱལ་པོའི་ཁབ་ཀྱི་གྲོང་ཁྱེར་ནང་བསོད་སྙོམས་སུ་གཤེགས་སོ།།”  ཞེས་སོགས་ནས་ཚིག་ལྷུག་དང་ཚིགས་བཅད་སྤེལ་མར་སྒྱུར་འདུག་ཅིང་། ཚིག་གནད་འགག་ཅན་ཚང་མར་ཞབས་མཆན་བཏབ་པ། ཚིག་སྦྱོར་བཟང་ལ་འདུས་ཆེ་བ། དོན་ཟབ་ཅིང་གོ་སླ་བ་དང་ཀློག་བདེ་བ། ཡིད་འགུག་གི་ནུས་པ་རབ་ཏུ་ལྡན་པ་སོགས་ནི་ལོ་ཙཱ་བའི་རྩོམ་གཤིས་སམ་རྩོམ་རྩལ་ཁོ་ན་ཡིན་པར་འདོད། 

གཞན་ཡང་ཆེས་དགའ་ས་ཞིག་ནི་ལོ་ཙཱ་བས་མདོ་འདིའི་ཚིགས་བཅད་རིང་ཐུང་རྣམས་སྒྱུར་བའི་སྐབས་སུ་མ་ཡིག་རྒྱའི་ཡིག་འབྲུ་ཉུང་ལ་ཚིག་རྐང་ཐུང་བ་ལྟར་གནའ་བོའི་བོད་བཙན་པའི་སྐབས་ཀྱི་མགུར་གྱི་རྩོམ་སྟངས་སྤྱད་དེ་སྒྱུར་ཡོད་ཅིང་། ཚིག་ཉོག་སྙུང་ཞིང་དོན་འདུས་པས་ཚིག་རྐང་ཐུང་བ་དང་། གནའ་བོའི་མགུར་རྩོམ་ལྟར་འདུག་པ་དེས་གོ་བདེ་བ་ཞིག་བཟོས་འདུག་སྙམ། བཙན་པོའི་སྐབས་ཀྱི་མགུར་རྩོམ་མང་ཆེ་བ་མིང་བརྡ་ཐ་སྙད་མང་པོ་ཞིག་གནའ་བོའི་མིང་བརྡ་རྙིང་པ་ཡིན་སྟབས་བརྡ་རྙིང་པ་སྟེ་དེང་སང་སྤྱོད་སྒོ་ཉུང་ཞིང་བེད་སྤྱོད་མ་བྱས་སྟབས། རང་བཞིན་གྱིས་དོན་མི་གོ་བར་གྱུར་ཡོད་པ་མ་གཏོགས། ཀློག་མཁན་སོ་སོར་བརྡ་རྙིང་དུ་གྱུར་མེད་པ་དག་ནི་བཙན་པོའི་སྐབས་ཀྱི་མགུར་རྩོམ་རྣམས་ཀྱང་གོང་ཞུས་ལྟར་གོ་སླ་ལ་འདུས་ཆེ་བ། ཚིག་གི་སྙིག་རོ་མེད་པའི་ཁྱད་ཆོས་ལྡན། རྩོམ་རིག་གི་མིང་བརྡ་ཐ་སྙད་ནི་ཚིག་གམ་སྐད་ཆའི་ཉིང་བཅུད་དེ་ཡིན་ཟེར་ན་གནའ་བོའི་མགུར་རྩོམ་ནི་དེའི་དཔེ་རུ་རུང་ཞིང་། མདོ་འདི་ཡང་དེའི་དཔེ་ཟླར་མི་འགྲན་རེ། 

མདོ་འདིའི་འགྱུར་དངོས་ལ་འཇུག་པ།

མདོ་འདིའི་བམ་པོ་དང་པོའི་མཚན་བྱང་ལ་༼ རྟེན་འབྲེལ་ལས་སྐྱེས་བའི་ལེའུ་དང་པོ།༽  ཞེས་འཁོད་ཅིང་། བམ་པོ་འདིའི་ཤོག་ངོས་གཉིས་པ་ནས་གནའ་བོའི་བོད་བཙན་པོའི་སྐབས་ཀྱི་མགུར་རྩོམ་ལྟར་དབུ་འཛུགས་གནང་འདུག་པ་ལས་དཔེ་མཚོན་ཚིག་བཅད་འགའ་རེ་ལུང་འདྲེན་བཞིན་མདོ་འདི་ངོ་སྤྲོད་ཅུང་ཙམ་ཞུ་ན་འདི་ལྟར། 

༡༽  བམ་པོ་དང་པོ།

བམ་པོ་དང་པོའི་ནང་དུ་གནའ་བོའི་རྩོམ་སྟངས་ཀྱི་དཔེ་དང་པོ། 

“ མཐའ་ཡས་ནི་ས་གཞི།

མཚོ་མོ་ནི་བཞིར་བརྟེན།།

རྒྱལ་པོའི་ནི་ཁབ་ཆེ།།

གཙུག་རི་ནི་བརྗིད་ཆགས།།

མི་མཆོག་ནི་ཞབས་འཆག།།

ས་རིམ་ནི་དྲུག་གཡོས།།

མཚོ་ཡི་ནི་གྲུ་ལ།།

རླུང་ཡོར་ནི་བསྐྱོད་འདྲ།” 

ཞེས་སྟོན་པ་བཅོམ་ལྡན་འདས་གང་ཉིད་རྒྱལ་པོའི་ཁབ་ཏུ་ཞབས་སོར་འཁོད་སྐབས་ཀྱི་རྣམ་པ་བརྗོད་དོན་དུ་བྱས་པ་ཡིན་ཞིང་། ཚིག་སྡེབ་ལེགས་ལ་གནའ་ཉམས་དོད་པ། ནང་དོན་འདུས་ཆེ་ལ་གོ་བདེ་བ་སོགས་ཚིག་རྐང་རེ་རེའི་དབར་དང་གསེབ་ཏུ་བོད་རང་གི་གནའ་བོའི་མིང་བརྡས་གསོན་ཉམས་མངོན་འདུག གོང་གི་ཚིགས་བཅད་འདི་ནི་མདོ་འདིའི་ནང་གི་གནའ་རབས་རྩོམ་སྟངས་ཅན་གྱི་ཚིགས་བཅད་དང་པོ་དེ་ཡིན་ཞིང་། ཚིགས་བཅད་འདི་མཇལ་སྐབས། མདོ་འདི་མི་མཐུད་ནས་མཇུག་བར་དུ་མཇལ་འདོད་ཀྱི་འདུན་པའི་རླབས་ཀྱི་ཟེགས་མ་མཁའ་རུ་འཕྱོ་ལ། བོད་རང་གི་གནའ་རབས་རྩོལ་སྟངས་འདི་ཡང་ཅི་ནས་སྦྱོང་དགོས་ཀྱི་འདུག་ཨང་སྙམ་པའི་ཚོར་བ་ཁད་ཀྱིས་སྐྱེས་འོང་། 

ཡང་། 

“ ཁྱོད་གཟུགས་ནི་མི་ལུས་གཅིག།།

མི་ལས་ནི་ལྷག་པའི་འཕྲུལ།།

དེ་དོན་ནི་ངས་མ་འཚལ།།

དེང་ཁྱོད་ནི་ཅི་ཕྱིར་ལྷག།།

རྒྱུ་མཚན་ནི་ཅི་ཡིན་བརྗོད།།

དོན་དེ་ནི་ཤེས་སུ་ཆུག།།

ང་ཡིས་ནི་དོན་ཤེས་ན།།

ཁྱོད་ཀྱི་ནི་རྗེས་སུ་འཇུག།།”  ཅེས་སོགས་ཡིད་དུ་འོང་ལ་གནའ་རྩོམ་ཀྱི་ཉམས་ཀྱིས་ཕྱུགས་འདུག་པས་མུ་མཐུད་ནས་མཇལ་འདོད་ཀྱི་འདུན་པ་འཕྱུར། 

བདག་གིས་ཀྱང་དེ་སྔོན་ནས་གནའ་རབས་བོད་བཙན་པའི་མགུར་གྱི་རྩོམ་སྟངས་ལྟར་ཚིགས་བཅད་རྩོམ་ཡིག་འགའ་རེ་བྲིས་མྱོང་ཡོད་པས། ད་རེས་མདོ་འདི་མཇལ་སྐབས་རང་གི་དེ་སྔོན་བྲིས་པ་དག་ཀྱང་དྲན་འོང་ཞིང་འབྱུང་འགྱུར་ཡང་རྩོམ་སྟངས་འདི་ལ་རྐང་ཚུགས་པ་ཞིག་ཅིས་ཀྱང་སྦྱོང་དགོས་འདུག་སྙམ་པའི་ཡིད་དམ་བཅས།

དེ་ལྟར་བམ་པོ་དང་པོའི་ནང་དུ་གནའ་རབས་མགུར་མའི་རྩོམ་སྟངས་ཅན་ཁག་དྲུག་འདུག་པ་མདོ་དངོས་ལས་མཇལ་འཚལ།

༢༽  བམ་པོ་གཉིས་པ།

བམ་པོ་གཉིས་པ་འདི་ནི་༼ ཉེར་སྦས་མཇལ་བའི་རྟེན་འབྲེལ་གྱི་ལེའུ་༽  ཞེས་པ་དེ་ཡིན་ཞིང་། ལེའུ་འདིར་གནའ་རབས་རྩོམ་སྟངས་ཚིགས་བཅད་ཁག་བཅོ་བརྒྱད་བཀོད་པའི་ཚིགས་བཅད་འགའ་དཔེར་དྲངས་ན། 

“ རྒྱན་ཆ་ནི་དོར།།

ཤིང་རྟར་ནི་ཞུགས།།

ཁ་ལོ་ནི་སློགས།།

ཁེར་རྐྱང་ནི་ཐོན།།

དབེན་པར་ནི་བསྟེན།།

སྒྲུབ་ལ་ནི་བརྩོན།། ”  

ཞེས་པའི་ཚན་པ་འདི་ནི་བདག་ཅག་གི་སྟོན་པ་ཐུགས་རྗེ་ཅན་དེ་རྒྱལ་པོའི་ཕོ་བྲང་དང་ཞལ་གྱེས། རིན་པོ་ཆེའི་རྒྱན་རྣམས་དོར་ཅིང་ཤིང་རྟའི་ཁ་ལོ་བ་ཡང་ཕྱིར་སློག་སྟེ་དབེན་པར་སྒྲུབ་ལ་གཞོལ་བའི་ནང་དོན་ལྡན། 

ཡང་།

“ ཁོ་བོས་ནི་ཤཱ་རིའི་བུར།།

གུས་ཤིང་ནི་བཀུར་ཏེ་མཆོད།།

ཤེས་རབ་ནིས་ཉོན་མོངས་སྤངས།།

གླིང་འདིར་ནི་འོད་སྣང་གསལ།།” 

ལྟ་བུའོ།། ཞེས་ཚིགས་བཅད་འདིའི་དབུས་སུ་ “ ཤེས་རབ་ནིས་” ཞེས་ “ ནི་” ལ་བྱེད་སྒྲ་སྦྱར་དེ་ཚིག་རྐང་གཞན་དང་དོ་མཉམ་པར་སྦྱར་ཐུབ་པའི་ཁྱད་ཆོས་ལྡན་ཡོད། 

ཡང་།

“ རྫུ་འཕྲུལ་ནི་རྩེར་སོན་པས།།

སྐྱེ་ཤིའི་ནི་ཟུག་རྔུ་འབྱིན།།

མཽང་གལ་ནི་གྲགས་ཅན་ལ།།

ང་ཡིས་ནི་དེང་འདིར་བཏུད།།”  

ཅེས་སོགས་ནམ་རྒྱུན་ཤཱ་རིའི་བུ་དང་མཽ་འགའ་གྱི་བུ་སོགས་ནི་སྲོལ་རྒྱུན་ཚིགས་བཅད་དང་ཚིག་ལྷུག་དག་ན་ལས། འདི་ལྟའི་བཙན་པོའི་མགུར་རྩོམ་སྟངས་ལས་མཇལ་དུ་མེད་ན། མཚར་སྣང་ལྡན་པའི་ཚོར་བ་ཞིག་ཀྱང་སྦྱིན་འོང་།

༣༽  བམ་པོ་གསུམ་པ།

བམ་པོ་གསུམ་པ་ནི་༼བྱང་ཆུབ་ལྗོན་ཤིང་མཆོད་པའི་རྟེན་འབྲེལ་གྱི་ལེའུ་༽  ཡིན་ཞིང་། བམ་པོ་འདིར་ཡང་བཙན་པོའི་སྐབས་ཀྱི་རྩོམ་སྟངས་ལྟར་ཚིགས་བཅད་ཁག་བཅུ་གཅིག་ཙམ་འདུག་ཅིང་དཔེ་རེ་གཉིས་དྲངས་ན་འདི་ལྟར།

“ ཁོ་བོས་ནི་ལྗོན་ཤིང་མཐོང་།།

སངས་རྒྱས་ནི་མཇལ་འདྲ་སྙམ།།

ལྗོན་ཤིང་ནི་སྐམ་གྱུར་ན།།

ང་ཡི་ནི་ཚེ་སྲོག་བྲལ།།” 

ཞེས་བཙུན་མོ་སྐར་རྒྱལ་དང་འབྲེལ་བའི་སྒྲུང་གི་བྱུང་བ་དེ་ནང་དོན་དུ་བྱས་ཤིང་ཚིག་དོན་གཉིས་ཐད་ནས་ཧ་ཅང་ཡིད་འཕྲོག་པ་ཞིག་འདུག

“ དེང་བདག་ནི་དོན་ཆེན་འགྲུབ།།

ཚད་བཟུང་ནི་བྲལ་བས་སྐྱོང་།།

བྷཱ་ར་ནི་དྷྭ་ཛའི་མཚན།།

སྐྱེས་ཆེན་ནི་མཇལ་རྒྱུ་ཡོང་།།”  ཞེས་དང་ཡང་།

“ ལྷ་ཡུལ་ནི་དབྱར་གནས་གྲུབ།།

སངས་རྒྱས་ནི་མཁའ་ལས་བབས།།

དེ་དུས་ནི་འཁོར་ཚོགས་ནང་།།

ཁོ་བས་ནི་སངས་རྒྱས་མཇལ།།”  ཞེས་སྟོན་པ་བཅོམ་ལྡན་འདས་ལྷ་ཡུལ་ནས་བབས་པའི་ཚུལ་གསལ་བ་འདི་ནི་རང་རེས་ལྷ་བབས་དུས་ཆེན་ཞེས་སྲུང་བརྩི་བྱེད་བཞིན་པ་དེའི་ནང་དོན་བརྗོད་པ་ཡིན་ཞིང་། ཚིགས་བཅད་གཅིག་ལས་མེད་ཀྱང་ཚིག་གིས་བརྗོད་པའི་ནུས་པས་དོན་གྱི་རྣམ་པ་ཡིད་ལ་གསལ་ལྷང་ངེར་འཆར་འོང་བ་ཞིག་འདུག

“ དགྲ་བཅོམ་ནི་དྲུག་ཁྲིའི་ཚོགས།།

ང་ལ་ནི་བསྐོར་ནས་གནས།།

ང་དང་ནི་འདིར་ཚོགས་རྣམས།།

ཉོན་མོངས་ནི་དྲུང་ནས་ཕྱུང་།།” 

ཞེས་དང་ཡང་། 

“ སུ་ཞིག་ནི་རྒྱལ་པོ་ཡིས།།

མཛད་རྗེས་ནི་འགྲན་པར་འཕོད།།

རྒྱལ་སྲས་ནི་ཀུ་ན་ཡིས།།

རྒྱལ་པོར་ནི་འགྲན་པར་རེ།།” 

ཞེས་དང་ཡང་། 

“ ཕོ་བྲང་ནི་ཅི་ཡོད་རྒུ།།

རིན་ཆེན་ནི་རིགས་ཕུད་པས།།

ནང་མི་ནི་བློན་འཁོར་བཅས།།

དགེ་འདུན་ནི་ལྔ་སྡེར་འབུལ།།

དགེ་འདུན་ནི་ཚོགས་སྡེ་གང་།།

བསོད་ནམས་ནི་ཞིང་རབ་མཆོག།།

ང་དང་ནི་ཀུ་ཎཱ་ལ།།

ཚོགས་རྫོགས་ནི་ཕྱིར་དུ་འབུལ།།” 

ཞེས་སོགས་ཚིག་སྦྱོར་སྙན་ལ་དོན་འདུས་ཆེ་བ། གནའ་རྩོམ་གྱི་ཉམས་འགྱུར་གྱིས་བལྟམས་འདུག ད་དུང་བམ་པོ་གསུམ་པ་འདིའི་ནང་གི་སྡེ་ཚན་ཞིག་གི་དབུ་ཁྱུད་དུ་གནའ་བོའི་ཡིག་རྙིང་དག་ལ་གསལ་བ་ལྟར་དབུ་ཁྱུད་ཕྱེད་ཀ་ཅན་དེ་བཀོད་འདུག་པས། དངོས་གནས་འབྲི་གུང་སྐྱབས་མགོན་འདི་བ་ནི་བླ་མ་མཁྱེན་ཡོན་རབ་རྫོགས་དང་ཞེ་ས་མ་ཞུས་ན་དྲན་རིགས་རྒོད་པོའི་ཐུགས་གཤིས་ཅན་ཞིག་ཀྱང་ཅི་ལ་མིན་སྟེ། གང་ཐད་ནས་བོད་ཡབ་མེས་དག་གི་མཛད་པའི་ཆ་ཕྲ་མོ་ཙམ་ཡང་ཐོན་རེ་ལ་ཐུགས་རྩལ་བཏོན་གནང་འདུག་ཨང་། 

དཔེར་ན། དེབ་འདིིའི་ཤོག་ངོས་༡༡༡ པར། ༄། མྱ་ངན་སེལ་གྱི་རྟེན་འབྲེལ།  ཞེས་པའི་ཚན་པ་དེའི་དབུར་གནའ་བོའི་སྲོལ་འཛིན་ལྟར་དབུ་ཁྱུད་ཕྱེད་ཅན་འདི་བཀོད་འདུག

༤༽  བམ་པོ་བཞི་པ།

བམ་པོ་བཞི་པའི་མཚན་བྱང་དུ་༼ རྒྱལ་སྲས་ལྷ་བྱ་གོང་མོའི་རྟེན་འབྲེལ་གྱི་ལེའུ་བཞི་པ་༽  ཞེས་འཁོད་འདུག བམ་པོ་བཞི་པ་འདིར་གནའ་རབས་རྩོམ་སྟངས་ལྟར་བྱས་པ་ཁག་ཉེར་བཞི་ཙམ་འདུག་ཅིང་། གོང་གི་རྩོམ་སྟངས་ལས་ཚིག་རྐང་རིང་ཐུང་མི་འདྲ་ཞིང་། བོད་བཙན་པོའི་སྐབས་ཀྱི་མགུར་རྩོམ་དུ་ཚིག་རྐང་རིང་ཐུང་མི་འདྲ་བ་སྣ་ཚོགས་ཡོད་པ་ལྟར་མདོ་འདིའི་འགྱུར་གྱི་ཁྲོད་དུའང་དེ་མཚུངས་རྐང་པ་རིང་ཐུང་མི་འདྲ་བའི་རྩོམ་སྟངས་སླེབས་ཐུབ་པར་གནང་འདུག 

བམ་པོ་འདིའི་ཚིགས་བཅད་དང་པོར་ཚན་པ་གཉིས་འདུག་པ་དཔེར་དྲངས་ན། 

“ དེ་རིང་ནི་བདག།།              དགའ་སྤྲོ་ནི་ཆེ།།

རྨ་བྱའི་ནི་རུས།།                ཡོངས་སུ་ནི་འདུས།།

ཕོ་བྲང་ནི་ཆོས།                 གོང་མཐོར་ནི་འཕེལ།།” 

ཞེས་ཚིག་གི་རྐང་པ་ཐུང་ནའང་དོན་ཆ་ཚང་བར་ནང་དུ་འདུས་ཡོད་ཅིང་། ཚེག་དབར་བཞི་ཅན་ཡིན་འདུག་པ་དེང་སང་འདི་ལྟའི་ཚེག་དབར་ཅན་འབྲི་མཁན་ཧ་ཅང་ཉུང་། 

“ གངས་རི་ནི་ཁྲོད་དུ།།        ཨུད་པལ་ནི་བཞད་སར།།

ལྷ་བྱ་ནི་གོང་མོ།།           བག་ཕེབས་ནི་གནས་བཅའ།།

ལྷ་སྲས་དེའི་མིག་ནི།།       ལྷ་བྱ་དེའི་མིག་འདྲ།།” 

ཞེས་པ་ལྟ་བུ་ཚེག་དབར་ལྔ་ཅན་དུ་སྒྱུར་འདུག 

“ དེ་རིང་ནི་ང་འདི་རུ།།

གཏམ་འདི་ནི་རྣ་བར་ཐོས།།

ལར་ནས་ནི་རང་གི་བུ།།

བྲལ་བ་ནི་སྙིང་འབྲལ་འདྲ།།

དྲན་པའི་ནི་རྐྱེན་བྱས་པས།།

ལྷག་པར་ནི་བརྗིད་ཆགས་འགྱུར།།” 

འདིའི་བརྗོད་དོན་ནི་མྱ་ངན་མེད་ཀྱིས་སྐབས་སུ་ཡུལ་རྡོ་འཇོག་སྟེ་ཏག་ཤི་ལ་རྒྱལ་པོས་མྱ་ངན་མེད་ལ་ངོ་ལོག་པས་བཙུན་མོ་སྐར་རྒྱལ་སྲུང་མས་རྒྱལ་སྲས་མེད་པར་བྱ་འདུན་གྱིས་མྱ་ངན་མེད་རྡོ་འཇོག་ཏུ་འབྱོན་པར་རྩོམ་པའི་སྐབས། རྒྱལ་སྲས་འགྲོར་འཇུག་པའི་ཐབས་བྱས་ཤིང་། མྱ་ངན་མེད་ཀྱིས་སྲས་ལ་གདམས་པའི་ཚིག་དོན་ཡིན་འདུག 

ཡང་རྒྱལ་སྲས་ལྷ་བྱ་གཡུལ་དུ་ཆས་ཏེ་མིག་འབྲས་གཉིས་ཤོར་བ་དང་ཕྱིར་མིག་མེད་རྒྱལ་སྲས་མྱ་ངན་མེད་ཀྱི་པང་དུ་ལོག་སྐབས་ཡབ་སྲས་མཇལ་བའི་ནང་དོན་བརྗོད་བྱ་བཟུང་བ་ཡིན་ཞིང་། ཡང་འདི་ལྟར།

“ ཁྱོད་མིག་ནི་ལྟ་ན་སྡུག།།

དེ་རིང་ནི་གང་དུ་གནས།།

མིག་འབྲས་ནི་ཤོར་བའི་རྐྱེན།།

ཁྱོད་ཀྱིས་ནི་ང་ལ་སྨོས།།

དེང་འདིར་ནི་མིག་མེད་པས།།

མཁའ་ལ་ནི་ཟླ་མེད་འདྲ།།

ཆ་བྱད་ནི་འདི་འདྲའི་ཚུལ།།

སུ་ཡིས་ནི་བསྒྱུར་དུ་བཅུག།།

ཁྱོད་སྔོན་ནི་ཆ་བྱད་དེ།།

ལྷ་ཡི་ནི་དྲང་སྲོང་འདྲ།།

སྙིང་རྗེ་ནི་མེད་མཁན་སུས།།

ཁྱོད་ཀྱི་ནི་མིག་དེ་ཕྱུང།།

གླིང་འདིར་ནི་ཁྱོད་ཀྱི་དགྲ།།

སུ་ཡིས་ནི་འདི་ལྟར་བྱས།།

ང་ཡི་ནི་སེམས་ནད་དེ།།

རྩ་བ་ནི་ཁྱོད་འདིར་ཐུག།།

ཁྱོད་ལུས་ནི་ལྟ་ན་སྡུག།།

སུ་ཡིས་ནི་མེད་པར་བྱས།།

སྐྱོ་གདུང་ནི་མེ་ལྕེ་ཡིས།།

དེ་རིང་ནི་ང་ལུས་བསྲེགས།།

དཔེར་ན་ནི་ཐོག་བབས་ནས།།

སྡོང་རྒན་ནི་བརླགས་དང་མཚུངས།།

སྐྱོ་གདུང་ནི་འབྲུག་སྐད་དེས།།

ང་ཡི་ནི་སྙིང་འདི་གས།།

རྒྱུ་རྐྱེན་ནི་འདི་དང་དེ།།

ཁྱོད་ཀྱིས་ནི་མྱུར་དུ་སྨྲོས།།”  ཞེས་པ་འདིར་ཚིགས་བཅད་ཅུང་མང་ལ་དོན་འདུས་ཆེ་བ། ནང་དོན་ནི་གོང་ཞུས་ལྟར་རྒྱལ་སྲས་ལྷ་བྱ་རྡོ་འཇོག་ཏུ་སོང་ནས་གཡུལ་ངོར་མིག་འབྲས་གཉིས་ཤོར་བ་དང་ཕྱིར་ཡབ་མྱ་ངན་མེད་ཀྱི་པང་དུ་ལོག་སྐབས་མྱ་ངན་མེད་ཀྱིས་རང་གི་སྲས་ཀྱི་མིག་འབྲས་གཉིས་ཕྱུང་ཟིན་པ་དང་གདོང་ཁྲག་གིས་སྦགས་ཏེ་ངོ་མི་ཆོད་པའི་ཚད་ན་ཡོད་པ། མིག་འབྲས་གཉིས་ཕྱུང་ཟིན་པའི་ཉམ་ང་བའི་གནས་སྟངས་དེ་མཇལ་སྐབས་མྱ་ངན་མེད་ཀྱི་སེམས་ཚོར་སོགས་བཀོད་ཡོད་ཅིང་། གནའ་བོའི་རྩོམ་ཉམས་འདི་འདྲའི་ཚིག་དོན་གྱི་ཉམས་འགྱུར་ཅན་ནི་རང་རེ་སྦྱོང་དགོས་པ་ཞིག་ཅི་ལ་མིན། ད་དུང་སྐབས་འདིར་ཆོས་རྒྱལ་མྱ་ངན་མེད་ཀྱི་བཙུན་མོ་སྐར་རྒྱལ་སྲུང་མ་ཡིས་རྒྱལ་པོ་ཡབ་སྲས་ལ་བློ་ལོག་པ་སྐར་རྒྱལ་ལྟ་བུ་ཡོད་པ་ཤེས་ཐུབ་ཅིང་། བཙུན་མོ་དེས་རྒྱལ་པོར་ངན་སེམས་འཆང་བཞིན་སྲས་མེད་བརླག་བྱེད་འདོད་པའི་ཕོ་བྲང་ནང་གི་ནང་འཁྲུག་ཀྱང་བསྟན་ཡོད། མ་གཞི་སྲས་ལྷ་བྱ་ནི་སྒྱུ་རྩལ་ཐམས་ཅད་ལ་མཁས་ཤིང་བྱད་གཟུགས་ལེགས་པས་བཙུན་མོ་སྐར་རྒྱལ་སྲུང་མ་སྲས་ལ་ཆགས། སྲས་ཀྱིས་ཁས་མ་བླངས་པར་བརླག་འདོད་པའི་ལས་དེ་བརྩམས་པ་ཡིན་འདུག  

ལོ་ཙཱ་བས་མདོ་འདི་སྒྱུར་བཞིན་དུ་བོད་ཀྱི་གནའ་རབས་རྩོམ་སྟངས་ཀྱི་ཁྱད་ཆས་ཀྱང་མི་འདྲ་བ་མང་པོ་ཐུགས་སུ་འཁོར་ཡོང་བ་ཡིན་ནམ། ཚིག་གི་སྡེབ་དང་དོན་གྱི་གཅུན་སྟངས་རྣམས་ནི་སྔ་མ་སྔ་མའི་སྟེང་ཕྱི་མ་ཕྱི་མའི་ཁྱད་ཆས་མང་པོ་ཞིག་བསྣན་ཡོང་བ་ལྟ་བུའི་ཚོར་བའང་ངང་གིས་སྟེར། 

༥༽ བམ་པོ་ལྔ་པ། 

བམ་པོ་ལྔ་པའི་མཚན་བྱང་ལ་༼ འབིར་བ་ཕྱེད་ཚལ་བསོད་སྙོམས་གྱི་(ཀྱི་)རྟེན་འབྲེལ་གྱི་ལེའུ་ལྔ་པ་༽  ཞེས་འཁོད་འདུག

བམ་པོ་ལྔ་པ་འདི་ཚིག་དོན་ཅུང་ཉུང་ཞིང་གནའ་རྩོམ་ལུགས་ཁག་གསུམ་ལས་མི་འདུག བརྗོད་དོན་ཧ་ཅང་གལ་ཆེ་སྟེ། ཆོས་རྒྱལ་མྱ་ངན་མེད་ལ་དད་པ་བརྟན་པོ་ཐོབ་རྗེས་དགེ་སློང་རྣམས་ལ་བཀའ་འདྲི་ཞུས་དོན། སངས་རྒྱས་ཀྱི་འཁོར་གྱི་ནང་ནས་སྦྱིན་པ་གཏོང་ཆེ་ཤོས་དེ་སུ་བྱུང་ངམ་ཞེས་པར། སྦྱིན་གཏོང་ཚད་ཆེ་ཤོས་དེ་གནས་བརྟེན་ཁེར་གནས་ལགས་ཡིན་གསུངས་པར། ཅི་ཙམ་ཞེས་པར། གསེར་སྲང་ཁྲག་ཁྲིག་གཅིག་བཏང་ངོ་གསུངས། མྱ་ངན་མེད་ཀྱིས་གནས་བརྟན་ཁེར་གནས་ཀྱིས་གསེར་སྲང་ཁྲག་ཁྲིག་གཅིག་བཏང་ན་ཁོ་བོས་ཀྱང་དེ་ལྟར་གཏང་ངོ་བསམ་སྟེ། མཆོད་རྟེན་བརྒྱད་ཁྲི་བཞི་སྟོང་བཞེངས། སངས་རྒྱས་སྐུ་འཁྲུངས་ས་དང་། སངས་རྒྱས་ས། ཆོས་འཁོར་སྐོར་ས། སྐུ་མྱ་ངན་ལས་འདས་སའི་གནས་སོགས་སོ་སོར་གསེར་སྲང་འབུམ་ཕྲག་རེ་ཕུལ་ནས། དགེ་འདུན་སྡེ་བཞི་ལ་མཆོད་པ་ཆེན་པོ་ཡང་ཕུལ། ཉིན་གཅིག་དུས་གཅིག་ལ་དགེ་སློང་འབུམ་ཕྲག་གསུམ་འདུས་སར་དགྲ་བཅོམ་པ་ཁྲི་གཅིག་དང་། སློབ་གཉེར་པ་ཉི་ཁྲི། གཞན་ཡང་བརྩོན་འགྲུས་ཅན་ཕལ་བ་རྣམས་ལ་བསོད་སྙོམས་ཕུལ་བ་སོགས་ཁྱོན་གསེར་སྲང་དུང་ཕྱུར་དགུ་དང་ས་ཡ་དྲུག་དགེ་སློང་རྣམས་ལ་ཕུལ་བ་སོགས་ནང་དོན་རྒྱ་ཆེན་པོ་ལྡན། 

རྩོམ་སྟངས་ཀྱི་དཔེ་ཞིག་དྲངས་ན་འདི་ལྟར།

“ དེང་འདིར་ནི་ཡིད་སྐྱོ་ལྡང་།།

སྲོག་ནོར་ནི་ཆེད་དུ་མིན།།

དགེ་སྦྱོང་ནི་ཚོགས་འབྲེལ་རྐྱེན།།

རྒྱལ་དང་ནི་དེ་ཡི་སྲས།།

བསོད་ནམས་ནི་ཚོགས་ཆེན་བསགས།།

ཞལ་ཟས་ནི་སྣ་ཚོགས་ཀྱིས།།

རྟག་ཏུ་ནི་མཆོད་པར་བྱས།།

དེ་ཚོ་ནི་དེང་དྲན་དུས།།

མིག་ཆུ་ནི་དབང་མེད་ཤོར།།”  

ཞེས་ཆོས་རྒྱལ་མྱ་ངན་མེད་དེས་འདས་དོན་དྲན་ཞིང་ཡིད་གདུང་སྐྱེས་པའི་ཚུལ་སོགས་གསོན་ཉམས་ལྡན་པའི་ཚིག་དོན་གྱི་ཕྱུགས་འདུག 

༦༽  བམ་པོ་དྲུག་པ།

བམ་པོ་དྲུག་པ་ནི་ ༼རྒྱལ་བའི་འགོད་ཐོ་དགྲ་བཅོམ་པ་ཉེར་སྦས་ཀྱི་རྟེན་འབྲེལ་ཀྱི་ལེའུ་དྲུག་པ་༽ ཞེས་འཁོད་འདུག།

བམ་པོ་འདིར་སྤྱིར་ཚིགས་བཅད་ཁག་བཅོ་ལྔ་ཡོད་ཅིང་དེའི་གྲས་སུ་གནའ་རྩོམ་ལྟར་བྱས་པ་གཅིག་ཀྱང་མི་འདུག

བམ་པོ་འདིའི་ནང་དོན་ནི་སངས་རྒྱས་མྱ་ངན་ལས་འདའ་བར་ཞལ་ཕྱོགས་ཏེ་ཡུལ་བཅོམ་བརླག་ཏུ་ཕེབས། ཀུན་དགའ་བོར་ང་འདས་ལས་ལོ་བརྒྱ་ལོན་པའི་ཚེ་བཅོམ་བརླག་འདིར་གུཔྟ་ཞེས་པའི་མིང་ཅན་འབྱུང་ཞིང་། དེའི་བུའི་མིང་ལ་ཉེར་སྦས་ཞེས་བྱ་བ། མཚན་མ་མེད་པའི་སངས་རྒྱས་ཞེས་པ་འབྱུང་ཞིང་། བསྟན་འགྲོའི་དོན་རྒྱ་ཆེར་བྱེད་པ་སོགས་ནང་དོན་ཟབ་ལ་ཡིད་འཕྲོག་པ་མང་དུ་གསུངས་འདུག 

༧༽ བམ་པོ་བདུན་པ།

བམ་པོ་བདུན་པ་ནི་ ༼རྒྱལ་བའི་གཏད་རབས་ལྔ་ལ་བསྟན་པ་གཏད་པའི་རྟེན་འབྲེལ་གྱི་ལེའུུ་བདུན་པ་༽ ཞེས་འཁོད། 

བམ་པོ་འདིར་སྟོན་པ་བཅོམ་ལྡན་འདས་སྐུ་མྱ་ངན་ལས་འདས་པའི་ཚུལ་སྟོན་པའི་སྐབས་སུ་བསྟན་པ་འོད་སྲུང་ཆེན་པོར་གཏད། འོད་སྲུང་གིས་ཀུན་དགའ་བོར་གཏད། ཀུན་དགའ་བོས་ཉི་མ་གུང་བར་གཏད། ཉི་མ་གུང་བས་ཤ་ནའི་གོས་ཅན་ལ་གཏད། ཤ་ནའི་གོས་ཅན་གྱིས་ཉེར་སྦས་ལ་གཏད། ཉེར་སྦས་ཀྱིས་དྷི་ཏི་ཀ་ལ་བསྟན་པ་གཏད་པར་མཛད། 

སྟོན་པའི་གཏམ་རབས་ངོ་སྤྲོད་དང་འོད་སྲུང་ཆེན་པོ་དང་ཀུན་དགའ་བོ། ཉི་མ་གུང་བ་དང་ཤ་ནའི་གོས་ཅན་བཅས་བཞིས་བསྟན་པ་གཏད་པའི་སྐོར་ཚན་པ་བཞིར་དབྱེས་ཤིང་། འོད་སྲུང་གི་གཏད་རབས་ནང་གནའ་རབས་རྩོམ་སྟངས་ཅན་ཀྱི་ཚིགས་བཅད་ཁག་གཉིས་འདུག་པ་ལས་གཞན་མི་སྣང་། གཏད་རབས་བཞིའི་ཚན་པའི་དབུ་འཛུགས་སྐབས་གནའ་སྲོལ་ལྟར་དབུ་ཁྱུད་ཕྱེད་ཅན་བཀོད་འདུག 

འོད་སྲུང་གི་གཏད་རབས་སྐབས་ཀྱི་གནའ་རྩོམ་སྲོལ་གྱི་དཔེ་དྲངས་ན་འདི་ལྟར།

“ བདག་གི་ནི་སངས་རྒྱས།།

བྱམས་སྙིང་ནི་ཆེ་ལྡན།།

སངས་རྒྱས་ནི་རིང་བསྲེལ།།

ཁོ་བོས་ནི་དེ་མཆོད།།

བྱང་ཆུབ་ནི་རྟོགས་པ།།

རྒྱུད་ལ་ནི་རང་འབྱོར།།

བྱ་དཀའི་ནི་ལས་གྲུབ།།

མཐའ་མ་ནི་མཆོད་བྱེད།།” 

ཞེས་འོད་སྲུང་གིས་ཀུན་དགའ་བོར་བསྟན་པ་གཏད་པའི་སྐབས་ཀྱི་བྱུང་བ་བརྗོད་སྙིང་དུ་བྱས་ཡོད། 

ཡང་དཔེ་གཞན་ཞིག་ནི་འོད་སྲུང་ཆེན་པོ་སྐུ་མྱ་ངན་ལས་འདས་པའི་ཤུལ་དུ་སྐྱོ་གདུང་གིས་མནར་བའི་སྐོར་སོགས་བརྗོད་པ་འདི་ལྟར།

“ ངེད་ཚོ་ནི་གནས་འདིར།།

འོད་སྲུང་ནི་རང་བྲལ།།

སེམས་ལ་ནི་མྱ་ངན།།

བཟོད་གླགས་ནི་དང་བྲལ།།

བཀའ་བསྡུས་ནི་ཕུགས་སུ།།

སྡུག་བསྔལ་ནི་ཆོས་སྐྱེས།།

མང་གྷའི་ནི་མི་རྣམས།།

ཁེར་རྐྱང་ནི་དབུལ་གྱར།།

འཇིག་རྟེན་ནི་ཐམས་ཅད།།

སྐྱབས་གནས་ནི་དང་བྲལ།།

དེང་འདིར་ནི་འོད་སྲུང་།།

སངས་རྒྱས་ནི་གཉིས་པ།།

དེང་འདིར་ནི་གཤེགས་མཛད།།

དམ་ཆོས་ནི་སྟེང་ལོག།།

དམ་ཆོས་ནི་གྲུ་ཁྱོམ།།

དམ་ཆོས་ནི་སྡོང་འགྱེལ།།

དམ་ཆོས་ནི་རླབས་འཕྱུར།།

བདུད་རྒྱལ་ནི་དགའ་བྱེད།།

སྐྱོང་བའི་ནི་ཆོས་འཁྲུགས།།” 

ཞེས་འོད་སྲུང་ཆེན་པོ་འདས་རྗེས་ཀྱི་ཡིད་གདུང་གི་རྣམ་པ་མངོན་པའི་ཚིགས་བཅད་གནའ་རབས་རྩོམ་སྟངས་ལྟར་བྱས་པ་ཤིན་ཏུ་སྙན་འཇེབས་ཤིང་། དམིགས་བསལ་ “ དམ་ཆོས་ནི་སྟེང་ལོག།། དམ་ཆོས་ནི་གྲུ་ཁྱོམ།།

དམ་ཆོས་ནི་སྡོང་འགྱེལ།། དམ་ཆོས་ནི་རླབས་འཕྱུར།།” ཞེས་པའི་དུམ་ཚན་འདི་ནི་ཧ་ཅང་སྙན་འཇེབས་ལྡན་པ་ཞིག་འདུག

༨༽  བམ་པོ་བརྒྱད་པ།

བམ་པོ་བརྒྱད་པ་ནི་ ༼ སྟོན་པའི་གཏད་རབས་ལྔའི་རྟེན་འབྲེལ་ལས། ཉེར་སྦས་ཀྱི་རྟེན་འབྲེལ་༽ ཞེས་འཁོད།

བམ་པོ་འདིར་ཤ་ནའི་གོས་ཅན་གྱིས་རི་མཐོན་པོའི་སྟེང་དགོན་པ་བཞེངས་གྲུབ་རྗེས་སྤོས་ཚོང་དཔོན་གྱི་བུ་མིང་ལ་ཉེར་སྦས་ཞེས་པ་དེ་འཁྲུངས་ཡོད་དམ་སྙམ་དགོངས་པ་ན། སྟོན་པ་འདས་ནས་ལོ་བརྒྱ་ལོན་ཚེ་འབྱུང་བའི་ལུང་བསྟན་ཐུགས་ལ་ཤར། དེ་ནས་ཉེར་སྦས་འཁྲུངས་ཤིང་རྙེད་དེ་རྗེས་སུ་བཟུང་བ། བཅོམ་བརླག་གི་སྤོས་ཚོང་དཔོན་གྱི་སྤོས་ཚོང་རབ་ཏུ་འཕེལ་བ་སོགས་བརྗོད་དོན་གྱི་བྱུང་བའི་སྒྲུང་ཧ་ཅང་སྙན་ལ་ཆོས་དང་ལྡན་པ། བཅོམ་བརླག་གི་ཡུལ་སྤྱིའི་སྐབས་དེའི་སྤྱི་ཚོགས་ཀྱི་འཚོ་གནས་སོགས་ཞིབ་ཏུ་གསལ་བས་ཧ་ཅང་རིན་ཐང་ཆེ། བམ་པོ་འདིར་གནའ་བོའི་རྩོམ་སྟངས་ཅན་གྱི་འགྱུར་དུམ་བུ་བདུན་ལས་དུམ་བུ་གཉིས་པ་དེར་ཚིགས་བཅད་བཅུ་ལྷག་ཙམ་འདུག་ཅིང་། ཏུན་ཧོང་ཡིག་རྙིང་ནང་གི་མགུར་རྩོམ་ལྟར་ཚིག་སྣ་ཐུང་ཞིང་ཚེག་ཁྱིམ་ལྔ་ཅན་དང་། ཡང་ཚེག་ཁྱིམ་བཞི་ཅན་གཅིག་བཅས་ཚིག་སྦྱོར་དང་དོན་བསྡུས་པ་རྨད་དུ་བྱུང་བ་ཞིག་འདུག་སྙམ། 

རྩོམ་སྟངས་དཔེར་དྲངས་ན་འདི་ལྟར།

“ སྔ་དུས་ནི་གོས་རྩེ་གྲོས།།

སྣ་ཚོགས་ནི་ཟབ་དགུས་བརྒྱན།།

དེ་སོགས་ནི་འཆོར་རྒྱན་གྱིས།།

མཛེས་སྡུག་ནི་ལུས་དེར་བརྒྱན།།

གང་ཞིག་ནི་ཐར་འདོད་ན།།

འདོན་ཡོན་ནི་བསུན་འབྱིན་བྱེད།།

དེང་འདིར་ནི་ལྟར་བར་འགྲོ།།

མཆོར་རྒྱན་ནི་མཛེས་སྡུག་མིན།།

དེར་འདིར་ནི་དེ་ལྟར་འོས།།

མི་དྲེགས་ནི་མི་དགའ་བས།།

རང་མདོག་ནི་དེ་ལྟར་འགྲོ།།

མཐོང་བས་ནི་བསུན་སྣང་སྐྱེས།།” 

ཞེས་ཨུ་པ་གུཔྟ་དང་སྨད་ཚོང་གཡོག་མོར་སྦྱར་བའི་སྒྲུང་དང་། ཡང་།

“ ཁྱོད་དང་ནི་ཚངས་པ་དང་།།

ཉི་ཟླ་དག་བརྒྱ་བྱིན་སྐྱབས།།

མེ་ཆེན་ནི་རྒྱ་མཚོ་ཡིས།།

བསྲེགས་རུལ་ནི་དེ་མི་ནུས།།

ང་ཡི་ནི་རོ་ཐག་གིས།།

འཇིང་པར་ནི་དམ་དཀྲིས་འདི།།

རྫུ་འཕྲུལ་ནི་བཅིངས་པ་འདི།།

དགྲོལ་བར་ནི་མི་ནུས་སོ།།”  ཞེས་བདུད་སྡིག་ཅན་ལྷ་ཡུལ་དུ་སོང་སྟེ་བཅིངས་ཐག་འགྲོལ་ཐབས་ཞུས་ཀྱང་ཐབས་མ་རྙེད་པའི་སྐོར་གསུངས་པ་ལྟ་བུ། ཡང་། 

“ པད་མ་ཅག་ཐག་པས།།

གངས་རི་དག་བཅིངས་ཏེ།།

འདེགས་པར་ནི་མི་བྱེད།།

དཀའ་བ་ནི་ཅང་མིན།།” 

ཞེས་སོགས་དང་། 

ཡང་ཚེག་ཁྱིམ་བཞི་ཅན་ནི་འདི་ལྟར།

“ ཁ་བཅད་ཟིན་བཞིན།།

ཁོ་བོས་དེ་བྱེད།།

སངས་རྒྱས་གཟུགས་སྐུར།།

ཕྱག་དེ་མི་འོས།། 

འདི་དག་ཐམས་ཅད།།

ཤེས་རབ་བཀུར་ཆེད།།

གནས་བརྟན་གུས་ཚེ།།

ང་ནི་ལྟུང་འགྲོ།།” 

ཞེས་སོགས་འདོད་ཁམས་བདུད་ཀྱི་རྒྱལ་པོས་ཉེར་སྦས་ལ་གསོལ་བའི་ཚིག་འདི་ལྟ་བུ་བཙན་པོའི་སྐབས་ཀྱི་མགུར་མའི་རྩོམ་སྟངས་དང་། མེ་ལོང་མའི་ཚིགས་བཅད་རྩོམ་སྟངས་གཉིས་ཀས་སྤེལ་མ་དང་ཚིགས་ལྷུག་བཅས་ནང་དོན་ཟབ་ཅིང་ཚིག་སྦྱོར་ཕུན་སུམ་ཚོགས་ལ། བརྡ་གསར་རྙིང་གཉིས་ཀྱིས་བསྟན་དོན་མཉམ་དུ་བསྲེས་མར་བརྒྱན་ཡོད་པས། གནའ་དེང་ཟུང་འབྲེལ་གྱི་ཚུལ་མངོན་ཞིང་། ཀློག་སྤྲོ་བ་ཞིག་འདུག

༩༽  བམ་པོ་དགུ་པ།

བམ་པོ་དགུ་པ་ནི་ ༼ ཉེར་སྦས་ཀྱི་སློབ་མའི་རྟེན་འབྲེལ་གྱི་ལེའུ་བརྒྱད་པ། སྟག་ཕྲུག་གི་རྟེན་འབྲེལ། ༽ ཞེས་འཁོད་འདུག 

བམ་པོ་འདིར་ནང་གསེས་དུམ་བུ་རྟེན་འབྲེལ་བཅུ་གཉིས་འདུག་པ་དག་ནི། ༡ སྟག་ཕྲུག་གི་རྟེན་འབྲེལ། ༢ འོ་ཟས་རོ་བཅུད་ཀྱི་རྟེན་འབྲེལ། ༣ རྒྱ་གར་ལྷོ་ཕྱོགས་པའི་རྟེན་འབྲེལ། ༤ རྒྱ་གར་བྱང་ཕྱོགས་པའི་རྟེན་འབྲེལ། ༥ ཚོང་དཔོན་དབང་ཕྱུག་ཟུང་གི་རྟེན་འབྲེལ། ༦ བདག་ལྟའི་བྲམ་ཟེའི་རྟེན་འབྲེལ། ༧ གཉིད་ཀྱི་རྟེན་འབྲེལ། ༨ གཉེར་ལས་ཀྱི་རྟེན་འབྲེལ། ༩ ལག་རྩལ་གྱི་རྟེན་འབྲེལ། ༡༠ ཟ་འཐུང་གི་རྟེན་འབྲེལ། ༡༡ འདོད་ཆུང་ཆོག་ཤེས་ཀྱི་རྟེན་འབྲེལ། ༡༢ ཤ་ཟའི་རྟེན་འབྲེལ། བཅས་རྟེན་འབྲེལ་བཅུ་གཉིས་ཀྱིས་གྲུབ་ཅིང་། བམ་པོ་འདིར་གནའ་རབས་རྩོམ་སྟངས་ཀྱི་ཚིགས་བཅད་མི་འདུག མང་ཆེ་བ་ཚིག་ལྷུག་མར་སྤེལ་འདུག 

༡༠༽  བམ་པོ་བཅུ་པ།

བམ་པོ་བཅུ་པ་ནི་ ༼ ཉེར་སྦས་ཀྱི་སློབ་མའི་རྟེན་འབྲེལ་ལས། ཤིང་སྡོང་གི་རྟེན་འབྲེལ།༽ ཞེས་འཁོད་འདུག  

བམ་པོ་འདིར་ནང་གསེང་དུམ་བུ་རྟེན་འབྲེལ་བཅུ་བདུན་གྱིས་གྲུབ་ཅིང་། དུམ་བུ་རྣམས་ཀྱི་དབུར་དབུ་ཁྱུད་ཕྱེད་ཅན། ༡ ཤིང་སྡོང་གི་རྟེན་འབྲེལ། ༢ སེར་སྣའི་རྟེན་འབྲེལ། ༣ གདོན་འདྲེའི་རྟེན་འབྲེལ། ༤ སྲིན་བུས་ཟ་བའི་རྟེན་འབྲེལ། ༥ ཀེང་རུས་སྒོམ་པའི་རྟེན་འབྲེལ། ༦ འདོད་རྔམ་གྱི་རྟེན་འབྲེལ། ༧ མདའ་རྩེ་བརྡར་པའི་རྟེན་འབྲེལ། ༨ བརྩེ་སེམས་ཀྱི་རྟེན་འབྲེལ། ༩ ཆུ་ཀླུང་གི་རྟེན་འབྲེལ། ༡༠ རྟོགས་པའི་རྟེན་འབྲེལ། ༡༡ གླང་རྫིའི་རྟེན་འབྲེལ། ༡༢ སྤྲུལ་པའི་མིའི་རྟེན་འབྲེལ། ༡༣ མི་སྐྱིད་པའི་སྡོད་གནས་ཀྱི་རྟེན་འབྲེལ། ༡༤ འཁར་གསིལ་གྱི་རྟེན་འབྲེལ། ༡༥ དགེ་མཐོང་གི་རྟེན་འབྲེལ། ༡༦ དགོན་པར་མཚན་གནས་གནང་བའི་རྟེན་འབྲེལ། ༡༧ དྷི་ཏི་ཀའི་རྟེན་འབྲེལ། བཅས་བཅུ་བདུན་གྱིས་གྲུབ་ཅིང་། བམ་པོར་འདིར་སྤྱིར་ཚིགས་བཅད་ཉུང་ཞིང་མང་ཆེ་བ་ལྷུག་མར་སྤེལ་འདུག གནའ་རྩོམ་ལྟར་ཅན་དུམ་བུ་གཉིས་ཡོད་པ་ལས་དང་པོ་རྟོགས་པའི་རྟེན་འབྲེལ་གྱི་ཚན་པ་ལས། ཡུལ་བཅོམ་བརླག་ཏུ་ཁྱིམ་ཞིག་ཏུ་བྱིས་པ་ཞིག་ཡོད་པ་ཉེར་སྦས་ལས་རབ་ཏུ་བྱུང་། ནགས་སུ་སྒོམ་དུ་བཏང་། རབ་བྱུང་བས་དེ་སྔའི་ཆུང་མ་མཛེས་པ་དེ་ཡིད་ལ་དྲན། ཉེར་སྦས་ཀྱིས་དེ་མཁྱེན་ཏེ་ཆུང་མའི་གཟུགས་སུ་སྤྲུལ་ནས་རབ་བྱུང་དེའི་ཉེར་བར་བཅར། དེས་མཐོང་ནས་ཁྱོད་ཅི་ལ་འོང་དྲིས། ཁྱོད་ཀྱིས་འབོད་འགུག་བྱས་པས་འོང་བསྙད། ངས་ནི་སྒོམ་སྒྲུབ་པས་གཏམ་བགག་ལ་ཇི་ལྟར་འབོད་ཅེས་པར། ཁྱོད་ཀྱི་རྟོགས་པས་འབོད་འགུག་བྱས་སོགས་དང་།  ཡང་ཉེར་སྦས་ཀྱིས་རང་གཟུགས་མངོན་བཞིན་གསུངས་པའི་ཚིགས་ནི་འདི་ལྟར།

“ གལ་ཏེ་ནི་ཁྱོད་མི་སེམས།།

མཛེས་མ་འདི་ཅི་ཕྱིར་མཐོང་།།

གལ་ཏེ་ནི་བལྟ་མི་འདོད།།

དེ་ཁྱོད་ནི་སེམས་མི་བྱེད།།

གལ་ཏེ་ནི་ཆགས་བྲལ་འདོད།།

དགའ་གདུང་ནི་དེ་མི་འོས།།

དཔེར་ན་ནི་སྐྱུགས་པའི་ཟས།།

སླར་དེ་ནི་ཟ་མི་རུང་།།”  ཞེས་བསྟན། རྟེན་འབྲེལ་མཐའ་མ། མདོའི་མཇུག་གི་རྟེན་འབྲེལ་གྱི་མཇུག་ཏུ་འདི་ལྟར།

“  ཉེར་སྦས་ཀྱི་རྟེན་འབྲེལ་མཇུག་རྫོགས་སོ། །

རྒྱལ་བསྟན་ནི་རྟགས་གནས།།

ཡུན་རིང་ནི་མི་ནུབ།།

རིང་བསྲེལ་ནི་གདུང་རྟེན།། 

དེ་ལྟར་ནི་གཏན་བཞུགས།།

བསྟན་འཛིན་ནི་སྐྱེས་བུ།།

དགའ་སྐྱིད་ནི་ཚད་འདས།།

བསྟན་པ་ནི་ཡུན་གནས།།

ཡང་དུ་ནི་མི་ནུབ།།” 

ཞེས་མདོ་འདིའི་མགོ་དབར་མཇུག་གསུམ་དུ་བཙན་པོའི་སྐབས་ཀྱི་གནའ་རྩོམ་གྱི་རྩོམ་སྟངས་བླངས་ཏེ་ཆོས་རྒྱལ་མྱ་ངན་མེད་ཀྱི་མདོ་འདི་ལེགས་པར་ཡོངས་སུ་གྲུབ་པར་བསྒྱུར་གནང་འདུག་པ་དང་། མདོ་འདིའི་རྒྱ་ཁྱོན་ནམ་ཚིགས་བཅད་དང་བམ་གྲངས་སོགས་ཀྱི་ཚད་ནི་འགྱུར་འདིའི་མཇུག་ཏུ་འདི་ལྟར་འཁོད་འདུག་སྟེ། 

“ ཞེས་ཆོས་རྒྱལ་མྱ་ངན་མེད་ཀྱི་རྟེན་འབྲེལ་ནས་བཟུང་སྟེ། ཉེར་སྦས་མྱ་ངན་ལས་མ་འདས་བའི(པའི་)བར་དུ། འདིར་སྙན་ངག་གི་ཚིགས་བཅད་ཁྱོན་སུམ་སྟོང་ཆིག་བརྒྱ་ཐམ་པ་དང་། སྙན་ངག་གི་དུམ་བུ་རེར་ཚིག་འབྲུ་སུམ་བཅུ་སོ་གཉིས། སློབ་མ་ཉི་ཤུ་རྩ་བརྒྱད་བཅས་བཞུགས་སོ།། ཨ་ཤོ་ཀའི་མདོ་ལས་བམ་པོ་བཅུ་པ་རྫོགས་སོ།། །།”  ཞེས་སྔར་མེད་པའི་ཆོས་རྒྱལ་མྱ་ངན་མེད་ཀྱི་མདོ་འདི་བཞིན་༧དཔལ་རྒྱལ་བ་འབྲི་གུང་བའི་ཆོས་བརྒྱུད་ཀྱི་བསྟན་པའི་བདག་པོ་༧འབྲི་གུང་སྐྱབས་མགོན་ཆེ་ཚང་རིན་པོ་ཆེ་དཀོན་མཆོག་བསྟན་འཛིན་འཕྲིན་ལས་ལྷུན་གྲུབ་མཆོག་གིས་རྒྱ་ནག་གི་སྐད་ནས་རང་རེ་གངས་ཅན་པའི་བོད་སྐད་དུ་ལེགས་པར་བསྒྱུར་ཅིང་གཏན་ལ་ཕབས་ཏེ་དེབ་གཟུགས་སུ་དཔར་བསྐྲུན་གནང་གྲུབ་ཅིང་འགྲེམ་སྤེལ་གནང་པར། ༧འབྲི་གུང་སྐྱབས་མགོན་ཆེ་ཚང་རིན་པོ་ཆེ་མཆོག་ལ་སྐུ་དྲིན་བླ་མེད་དུ་ཆེ་ཆེ་ཆེ་ཞུ་ཞིང་། མདོ་འདི་བོད་སྐད་དུ་བསྒྱུར་གནང་བའི་མཐུ་ལ་བརྟེན་ནས་མདོ་འདིའི་བསྟན་པ་རབ་རུ་དར་ཞིང་རྒྱས་པ་དང་། གངས་ཅན་འགྲོ་བའི་མགོན་སྐྱབས་དམ་པ་ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག་༧གོང་ས་ལྷ་མིའི་རྣམ་འདྲེན་ཆེན་མོ་༧རྒྱལ་དབང་སྐུ་ཕྲེང་བཅུ་བཞི་པ་མཆོག་གི་སྐུ་ཚེ་ཞབས་པད་སྲིད་མཐའི་པར་དུ་བརྟན་ཅིང་། ཐུགས་ཀྱི་བཞེད་དགོངས་མ་ལུས་ལྷུན་གྱིས་འགྲུབ་པ་དང་། བོད་གངས་ཅན་གྱི་རིས་སུ་མ་ཆད་པའི་བསྟན་བདག་བླ་ཆེན་རྣམ་པ་དང་། གདན་ས་བཤད་སྒྲུབ་གྲྭའི་མཁན་པོ་དང་བླ་སྤྲུལ་དགེ་བཤེས་དགེ་འདུན་གྲྭ་བཙུན་འདུས་མང་། དད་ལྡན་མང་ཚོགས་སོགས་ཐུགས་མཐུན་དམ་ངང་གཙང་སྐུ་ཚེ་བརྟན་ཅིང་། བོད་གཞིས་བྱེས་མྱུར་དུ་མཉམ་འཛོམས་དང་། འཇིག་རྟེན་བདེ་ཞིང་འགྲོ་རྣམས་དགའ་བདེའི་དཔལ་ལ་ལོངས་སྤྱོད་པའི་རྒྱུར་གྱུར་ཅིང་། ཕྲན་གྱིས་མདོ་འདི་མཇལ་བའི་ཟིན་ཐོ་ཕྲན་བུ་བཏབ་པ་འདིས་ཀྱང་རང་རེ་བོད་ཡིག་ཀློག་མཁན་ཀུན་མདོ་འདི་མཇལ་བར་སྐུལ་ཅིང་དེའི་འཕྲིན་ལས་དང་དགེ་ཚོགས་ཅི་འབྱུང་རྒྱལ་བསྟན་དར་རྒྱས་དང་འགྲོ་བ་བདེ་ཞིང་འཛམ་གླིང་ཞི་བདེར་སྤྱོད་པར་སྨོན་ཏོ།། 

གུས་པ་སློབ་གཉེར་པ་གཅན བཟོད་རྒྱམ་པས་ཟླ་ཚེས་བཟང་པོར་གྲུབ་པར་བྱས།

༢༠༢༡།༡༡། ༢༥། 

མདོ་འདིའི་མཇལ་བྱང་དང་འབྲེལ་བའི་ཞབས་མཆན་རྣམས་གཤམ་གསལ་ལྟར།

¹ མདོ་འདིའི་སྔོན་གླེང་དང་ལེའུ་འགའ་ཞིག་( སྲོང་བཙན་ཚངས་དབྱངས་) ཞེས་པའི་དུས་དེབ་རིམ་པར་འཁོད་འདུག མདོ་འདི་བོད་སྒྱུར་གྱི་གླེང་གཞི་གོང་གི་དུས་དེབ་འདོད་ཐེངས་བརྒྱད་འཁོད་འདུག 

² མདོ་འདིའི་བོད་འགྱུར་དུམ་ཚན་བྱས་ཏེ་དུས་དེབ་ཏུ་འགོད་སྐབས་འབྲི་གུང་སྐྱབས་མགོན་གྱིས་མཁའ་དབྱིངས་རྡོ་རྗེ་ཞེས་པའི་མཚན་ཞིག་ཀྱང་བདེ་སྤྱོད་གནང་འདུག་ཅིང་། དུམ་ཚན་ལ་ལར་འབྲི་གུང་སྐྱབས་མགོན་ཆེ་ཚང་རིན་པོ་ཆེ་མཆོག་ཅེས་མཚན་དངོས་བཀོད་གནང་འདུག འབྲི་གུང་སྐྱབས་མགོན་རིན་པོ་ཆེས་མཁའ་དབྱིངས་རྡོ་རྗེ་མཚན་བེད་སྤྱད་དེ་༼སྲོང་བཙན་སྒམ་པོའའི་རྣམ་ཐར་༽ དང་ ༼ སྲོང་བཙན་གྱི་མགུར་དང་མགར་གྱི་མགུར་ལན།༽ (ཏུན་ཧོང་བྲག་ཕུག་གི་ཡིག་རྙིང་།༽ ༼སྐད་ཡིག་རིག་པ།༽ ༼བྷ་ར་བྷ་དྷུར་གྱི་ནང་པའི་མཆོད་རྟེན་ཆེན་མོ།༽ ༼འབྲོག་པ། ༽ ༼དོན་གྲུབ་རྒྱལ་གྱི་ཏུན་ཧོང་གླུ་མཆིད་ཀྱི་འགྲེལ་བརྗོད་ལ་དཔྱད་ཞིབ་བྱས་པ། ༽ ཞེས་དཔྱད་རྩོམ་མང་པོ་(སྲོང་བཙན་ཚངས་དབྱངས་) འདོད་ཐེངས་རིམ་པར་བཀོད་འདུག་ཅིང་། མཁའ་དབྱིངས་རྡོ་རྗེ་ནི་འབྲི་གུང་སྐྱབས་མགོན་རིན་པོ་ཆེའི་མཚན་གཞན་ཞིག་ཡིན་པའང་ཤོར་འཕྲོས་སོ།། 

³ ཚ་རོང་དབྱངས་ཅན་སྒྲོལ་དཀར། ༄༅།།སྡེ་དཔོན་མི་དྲག་གི་སྲས་མོ་གཞོན་ནུ་མ་ཞིག་གིས་སྒེའུ་ཁུང་ནས་མཐོང་བའི་བོད་ཀྱི་རྒྱལ་ས་ལྷ་སའི་སྣང་ཚུལ་མདོར་བསྡུས། ཤོག་ངོས་༣༥༨ ནས་༣༧༦ པར་གསལ། 

⁴ འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༡༣ པར་གསལ། 

5 སྲོང་བཙན་ཚངས་དབྱངས། འདོན་ཐེངས་བཞི་པ། རྒྱ་གར་གྱི་རྒྱལ་པོ་ཨ་ཤོ་ཀའི་མདོ། མཁའ་དབྱིངས་རྡོ་རྗེ། (རྒྱ་གར་གྱི་རྒྱལ་པོ་ཨ་ཤོ་ཀའི་མདོ། AŠOKÄVADANA (SÜTRA) ལེའུ་དང་པོ། རྒྱུ་རྐྱེན་ལས་སྐྱེས་པའི་བམ་པོ་དང་པོ།  ༡ ནས་༢༡ བར། ཞེས་འཁོད་འདུག་ཅིང་མངོ་ལེའུ་དང་པོ་ཆ་ཚང་བ་འདུག བམ་པོ་དང་པོ་དང་། ལེའུ་དང་པོ་ཞེས་མི་འདྲ་བ་ཅང་འདུག  བོད་འགྱུར་དེབ་གཟུགས་ཤོག་ངོས་༡༣ ནས་༤༩ བར་གསལ།  

⁶ འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༡5 པར་གསལ། 

⁷ འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༤༡ པར་གསལ། 

⁸ སྲོང་བཙན་ཚངས་དབྱངས། འདོན་ཐེངས་ལྔ་པ།  ཆོས་རྒྱལ་མྱ་ངན་མེད། འབྲི་གུང་༧སྐྱབས་མགོན་ཆེ་ཚང་རིན་པོ་ཆེ་མཆོག དུས་དེབ་དུ་(གནས་བརྟན་ཆེན་པོ་གུཔྟ་མཇལ་བའི་སྐོར་གྱི་བམ་པོ་གཉིས་པ།) ཤོག་ངོས་༡ ནས ༢༠ བར།  ཞེས་འཁོད་པ་དང་། བོད་འགྱུར་དེབ་ཏུ་(ཉེར་སྦས་མཇལ་བའི་རྟེན་གྱི་ལེའུ།) ཞེས་འཁོད། རྒྱལ་པོ་ཨ་ཤོཀའི་མདོ། ལེའུ་གཉིས་པ། ཆ་ཚང་བ་འདུག བོད་འགྱུར་དེབ་གཟུགས་དང་ཅུང་མི་འདྲ། བོད་འགྱུར་དེབ་གཟུགས་ཤོག་ངོས་༥༡ ནས་༨༩ བར་གསལ།

⁹ འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༧༡ པར་གསལ། 

¹0 འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༨༡ པར་གསལ། 

¹1 འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༨༣ པར་གསལ། 

¹2 སྲོང་བཙན་ཚངས་དབྱངས། འདོན་ཐེངས་དྲུག་པ། རྒྱ་གར་གྱི་རྒྱལ་པོ་ཨ་ཤོ་ཀའི་མདོ། འབྲི་གུང་༧སྐྱབས་མགོན་ཆེ་ཚང་རིན་པོ་ཆེ་མཆོག ( རྒྱ་གར་གྱི་རྒྱལ་པོ་ཨ་ཤོ་ཀའི་མདོ།(འདོན་ཐེངས་སྔ་མའི་འཕྲོས།)ལེའུ་གསུམ་པ། བྱང་ཆུབ་ལྗོན་ཤིང་ལ་མཆོད་པའི་རྟེན་འབྲེལ་གྱི་སྐོར་བམ་པོ་གསུམ་པ། (༡ ནས་༡༡ བར། ཞེས་འཁོད་འདུག ལེའུ་འདི་ལ་དུམ་ཚན་གཉིས་ཡོད་པ་ལས་སྔ་མ་(བྱང་ཆུབ་ལྗོན་ཤིང་ལ་མཆོད་པའི་རྟེན་འབྲེལ་གྱི་སྐོར་བམ་པོ་གསུམ་པ།) ཞེས་པ་དེ་བཀོད་འདུག བོད་འགྱུར་དེབ་གཟུགས་ཤོག་ངོས་༩༡ ནས་༡༠༩ བར་གསལ།

¹3 འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༩༣ པར་གསལ། 

¹4 འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༩༧ པར་གསལ། 

¹5 འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༡༠༡ པར་གསལ། 

¹6 འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༡༠༥ པར་གསལ། 

¹7 འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༡༠༥ པར་གསལ། 

¹8 འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༡༠༧ པར་གསལ། 

¹9 སྲོང་བཙན་ཚངས་དབྱངས། འདོན་ཐེངས་བདུན་པ། རྒྱ་གར་གྱི་རྒྱལ་པོ་ཨ་ཤོ་ཀའི་མདོ། འབྲི་གུང་༧སྐྱབས་མགོན་ཆེ་ཚང་རིན་པོ་ཆེ་མཆོག (རྒྱ་གར་གྱི་རྒྱལ་པོ་ཨ་ཤོ་ཀའི་མདོ།(འདོན་ཐེངས་སྔ་མའི་འཕྲོས།) ལེའུ་བཞི་པ། (མྱ་ངན་སེལ་གྱི་རྟེན་འབྲེལ་གྱི་སྐོར་བམ་པོ་བཞི་པ།) ཤོག་ངོས་༡༡༡ ནས་༡༡༣ བར། ཞེས་འཁོད་པ་དང་། དེབ་གཟུགས་ནང་དུ་བམ་པོ་གསུམ་པའི་ནང་གསེས་(མྱ་ངན་སེལ་གྱི་རྟེན་འབྲེལ། ) ཞེས་པ་དེ་ཡིན་འདུག དེབ་གཟུགས་བོད་འགྱུར་ལས་ཚན་པ་འདི་ལེའུ་གསུམ་པར་དུམ་ཚན་གཉིས་ཡོད་པའི་ཕྱི་མར་བཞག་འདུག བོད་འགྱུར་དེབ་གཟུགས་ཤོག་ངོས་༡༡༡ ནས་༡༣༣ བར་གསལ།

²0 སྲོང་བཙན་ཚངས་དབྱངས། འདོན་ཐེངས་བརྒྱད་པ། ཆོས་རྒྱལ་མྱ་ངན་མེད་ཀྱི་བསྒྱུར་ཡིག་འགོ་བརྗོད། འབྲི་གུང་༧སྐྱབས་མགོན་ཆེ་ཚང་རིན་པོ་ཆེ་མཆོག  ལེའུ་སྔ་མའི་འཕྲོས། (རྒྱལ་སྲས་ལྷ་བྱའི་རྟེན་འབྲེལ་གྱི་བམ་པོ་བཞི་པ།) ཤོག་ངོས་ ༡ ནས་༢༢ བར། ཞེས་ལེའུ་བཞི་པ་ཆ་ཚང་འདུག བོད་འགྱུར་དེབ་གཟུགས་ནང་དུའང་ལེའུ་བཞི་པ་ཆ་ཚང་ཡིན་ནའང་དུས་དེབ་དང་འགྱུར་དེབ་ནང་འཁོད་པ་གཉིས་ཅུང་མི་འདྲ་འདུག བོད་འགྱུར་དེབ་གཟུགས་ཤོག་ངོས་༡༣༥ ནས་༡༧༢ བར་གསལ།

²1 འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༡༣༥ པར་གསལ། 

²2 འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༡༣༧ པར་གསལ། 

²3 འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༡༣ པར་གསལ། འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༡༤༡ པར་གསལ། 

²4 འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༡༦༣ པར་གསལ། 

²5 ཇོ་ནང་ཏ་རཱ་ན་ཐ། (དམ་ཆོས་རིན་པོ་ཆེ་འཕགས་པའི་ཡུལ་དུ་ཇི་ལྟར་དར་བའི་ཚུལ་གསལ་བར་སྟོན་པ་དགོས་འདོད་ཀུན་འབྱུང་ཞེས་བྱ་བ་བཞུགས་སོ། ) ཞེས་པའི་ཤོག་ངོས་༨༡ ནས་མར་ཁྲོད་དུ་བཙུན་མོ་སྐར་རྒྱལ་བསྲུངས་མ་ཞེས་པས་ཆོས་རྒྱལ་མྱ་ངན་མེད་ཡབ་སྲས་བརླག་པར་བརྩམས་པའི་བྱུང་བ་མང་དུ་འཁོད་འདུག དེ་ཡང་རྒྱལ་སྲས་དེ་བྱད་གཟུགས་ཤུན་ཏུ་ལེགས་ལ་སྒྱུ་རྩལ་ཐམས་ཅད་ལ་བྱང་བ། མིག་འབྲས་གཉིས་ནི་རི་གངས་ཅན་ལ་གནས་པའི་བྱ་ཀུ་ན་ལའི་མིག་དང་འདྲ་བ་ཡོད་པས་དྲང་སྲོང་ཞིག་གིས་མཚན་དེ་ལྟར་བཏགས་སྐད། མྱ་ངན་མེད་ན་ཚ་དྲག་པོས་མནར་སྐབས་ཞགས་བདུན་པ་རྒྱལ་སྲིད་བཙུན་མོར་གཡར་པ་དང་། སྐབས་དེར་སྲས་ཀྱི་མིག་ཕྱུང་བའི་བཀའ་ཕབས་པ་སོགས་རྙོག་འཛིངས་ཅན་གྱི་བྱུང་པ་བཤད་སྟངས་གཞན་ཞིག་ཀྱང་འདུག་པ་སོགས་དཔེ་དེར་གཟིགས། ཏཱ་ར་ནཱ་ཏའི་གསུང་ཞེས་པའི་ཤོག་ངོས་༨༡ ནས་གསལ། 

²6 སྲོང་བཙན་ཚངས་དབྱངས། འདོན་ཐེངས་བཅུ་པ། རྒྱལ་པོ་ཨ་ཤོ་ཀའི་མདོ། ལེའུ་ལྔ་པ། འབྲི་གུང་༧སྐྱབས་མགོན་ཆེ་ཚང་རིན་པོ་ཆེ་མཆོག ༡ ནས་༡༠ བར། ལེའུ་ལྔ་པ། ཆ་ཚང་། ཡིན་ནའང་ལེའུ་འདིའི་མཚན་བྱང་དུས་དེབ་ནང་འཁོད་མི་འདུག བོད་འགྱུར་མར་མཚན་བྱང་( འབིར་བ་ཕྱེད་ཚལ་བསོད་སྙོམས་གྱི་(ཀྱི་)རྟེན་འབྲེལ་གྱི་ལེའུ་ལྔ་པ། ) ཞེས་འཁོད་འདུག བོད་འགྱུར་དེབ་གཟུགས་ཤོག་ངོས་༡༧༣ ནས་༡༨༧ བར་གསལ། དུས་དེབ་འདོད་ཐེངས་བཅིུག་པར་མདོ་འདིའི་བོད་འགྱུར་འཁོད་མི་འདུག འདོན་ཐེངས་བཅིུས་པའི་དཀར་ཆག་དུ་(རྒྱལ་པོ་ཨ་ཤོ་ཀའི་མདོ། མཁའ་དབྱིངས་རྡོ་རྗེ། ཤོག་ངོས་༡ ནས་༡༧ ) ཞེས་འཁོད་འདུག་མོད། དུས་དེབ་མ་རེག་པས་ལེའུ་གང་ཡིན་མ་ངེས། 

²7 འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༡༧༥ པར་གསལ། 

²8 འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༢༢༣ པར་གསལ། 

²9 འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༢༢༩ པར་གསལ། 

³0 འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༢༦༥ པར་གསལ། 

³1 འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༢༧༧ པར་གསལ། 

³2 འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༢༧༧ པར་གསལ། 

³3 འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༢༨༥ པར་གསལ། 

³4 འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༣༤༧ པར་གསལ། 

³5 འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༢༦༣ པར་གསལ། 

³6 འབྲི་གུང་སྐྱབས་མགོན་འཕིན་ལས་ལྷུན་གྲུབ། བོད་བསྒྱུར། ཨ་ཤོ་ཀའི་མདོ། ཐའེ་ཝན། ཐའེ་པེ། ༢༠༢༡། ཤོག་ངོས་༢༦༣ པར་གསལ། 

³7 ཞོར་འཕྲོས་བཀའ་དྲིན་ཞུ་ཡུལ་གཅིག་ནི། ངོ་དེབ་དྲ་ལམ་ནས་འབྲེལ་བ་ཞུས་ཏེ་མདོ་འདིའི་དཔེ་དེབ་སྲོང་བཙན་དཔེ་མཛོད་ཁང་ནས་ཝཱ་ཎར་བསྐུར་གནང་མཁན་རྒན་Namgyal NG Gyalpo (རྣམ་རྒྱལ་དོན་གྲུབ་)ལགས་ཀྱིས་དགའ་ཞིང་སྤྲོ་བའི་ངང་ནས་མདོ་འདི་མྱུར་མགྱོགས་སྦྲགས་ཟམ་བརྒྱུད་བསྐུར་འབྱོར་བྱུང་མ་ཟད། སྲོང་བཙན་དཔེ་མཛོད་ཁང་ལས་སྲོང་བཙན་ཚངས་དབྱངས་དུས་དེབ་༡༢ ཀྱི་དཀར་ཆག་མཁོ་སྤྲོད་བར་སྙིང་ཐག་པ་ནས་སྐུ་དྲིན་ཆེ་ཞུ་ཞིང་། ཁྱེད་ཀྱིས་ལྷག་བསམ་བཟང་པོས་རོགས་ཏན་གནང་མེད་ཚེ་གུས་པས་མདོ་འདི་མཇལ་བ་དང་མཇལ་བྱང་འདི་ཡང་འབྲི་ཐུབ་མེད་པས་ཁྱེད་ཀྱིས་རོགས་པ་གནང་བར་བཀའ་དྲིན་ཤིན་ཏུ་ནས་ཆེ་ཞུ། 

གུས་པས་སློབ་སྦྱོང་གི་ཞོར་ནས་མདོ་འདིའི་མཇལ་བྱང་འདི་འདྲ་ཞིག་འབྲི་ཁུལ་ཙམ་བྱས་མོད། ཕྲན་ལ་ཤེས་སྦྱོང་དམན་པས་མ་རྟོགས་ལོག་བཤད་དང་། མེད་པ་འོལ་ཚོད་ཀྱིས་ནོངས་པ་ཅི་མཆིས་འཐོལ་གཤེགས་འབུལ་ཞིང་། དགེ་ཚོགས་ཅི་འབྱུང་རྣམ་དཀར་དགེ་བའི་བོ་ངོར་བསྔོ་བར་བྱ། 

མཐར་བོད་ཡིག་ཀློག་མཁན་ཀུན་གྱིས་མདོ་འདི་མཇལ་བར་སྐུལ་མ་ཞུ་ཞིང་། དེ་བས་ཀྱང་མཇལ་བྱང་འདི་འབྲི་འདུན་གཙོ་བོ་ཡང་བོད་ཀྱི་བཙན་པོའི་སྐབས་ཀྱི་གནའ་རབས་མགུར་མའི་རྩོམ་སྟངས་འདི་ངོ་འཕྲོད་པ་དང་ཡང་ན་རྩོམ་སྟངས་འདི་ལ་སློབ་སྦྱོང་དང་འབྲི་སྤེལ་གནང་རྒྱུར་༧འབྲི་གུང་སྐྱབས་མགོན་མཆོག་གིས་ཀྱང་ཐུགས་རེ་ཆེན་པོ་གནང་འདུག་སྙམ་པ་ཁྱེད་ཀློག་མཁན་ཀུན་གྱིས་ཐུགས་ལ་འཛིན་པར་ཞུ།