རང་ཉིད་ལ་གདམས་པའི་མདོ།

རང་ཉིད་ལ་གདམས་པའི་མདོ། 

ཉི་མ་སྤྲིན་གྱིས་བཀབ་པ་ཡིས།། 
ང་ཡི་མགོ་བོ་གཡོགས་དང་མཚུངས།། 
བྱ་བྱེའུ་གྲེ་བ་བསྲིངས་ནས་ནི།། 
ཅིར་ཅིར་དབྱངས་ཀྱིས་ལྷིང་འཇགས་དཀྲོགས།། 

ཞོགས་རླུང་བསིལ་བོས་ལུས་པོ་བཀྲུས།། 
ཁོར་ཡུག་ཡངས་པོས་ཡིད་སྒོ་ཕྱེས།། 
ཕྱི་དང་ནང་ན་གནས་རྣམས་ཀྱིས།། 
ང་ཡི་སྙན་ཚིག་ལམ་སྣ་འདྲེན།། 

ང་ནི་དབང་པོ་འཁྲུག་སམ་ཅི།། 
ལ་ལར་སེམས་དག་གནས་སམ་ཅི།། 
ཡིད་ཀྱི་དྭངས་མ་ལྷག་གམ་ཅི།། 
ད་དུང་མགོ་བོ་རྨོངས་འདི་ཅི།། 

སེམས་འདིས་ཅི་ཡང་མི་ཤེས་སམ།། 
ལུས་འདིར་རང་དབང་མེད་འདི་ཅི།། 
རང་འདོད་གསལ་བོ་མ་ཡིན་ནམ།། 
ད་དུང་འཆང་མོ་ཉུག་དགོས་ཅི།། 

ལས་དག་གསལ་བོར་གནས་གྱུར་ན།། 
ལས་ལ་དཔག་པའི་ལས་བྱོས་ཤིག། 
ལས་གང་མུན་པར་གནས་གྱུར་ན།། 
ལས་བྱས་གཡང་ལ་ཟེགས་ཉེན་འགྱུར།། 

ང་ནི་ཁྱོ་བོར་གྱུར་ཏམ་ཅི།། 
ཆུང་མ་ག་ཤད་གནས་སམ་ཅི།། 
ཁྱོ་ཤུག་མི་ལྡན་སེམས་འདི་ཡིས།། 
ཁྱོད་ཉིད་ལ་ནི་རྟག་ཏུ་གཅེས།། 

ཡིད་ཁྱོད་དབུས་སུ་ལེགས་བཞུགས་ཏེ།། 
དབང་པོའི་འཕྲུལ་འཁོར་བཀོལ་བར་བྱས།། 
ཐམས་ཅད་བྱུང་རྒྱལ་ཕྱོགས་བཏང་བས།། 
ཐལ་བར་གྱུར་ན་ཡིད་མུག་འགྱུར།། 

འབྲས་བུ་ཐོབ་ཆེད་ལྗོན་པའི་རྩེར།། 
མི་དགོས་ས་ཡི་སྟེང་དུའང་ཆོག། 
དོན་རྣམས་མཆོག་དམན་ལེགས་ཐོབ་ལའང་།། 
དྲུང་དུ་འདུར་རྒྱུགས་ག་ལ་དགོས།། 

དོན་ཆེན་ངང་རིང་ཡུན་གྱིས་བསྒྲུབ།།
 ཕག་ལྟོ་ཟ་བའི་སྲོལ་མ་ཡིན།། 
འོན་ཏེ་ལ་ལ་ཉེ་བར་བཅར།། 
ལ་ལ་རིང་ནས་ལེགས་པར་འོང་།། 

ང་ནི་གང་དག་སྒུག་སྒུག་བྱས།། 
ཚེ་འདི་འཛད་པའང་ལེགས་པར་རྟོགས།། 
འོན་ཏེ་འདོད་པའི་ནོར་མཆོག་དེ།། 
ཉེ་རིང་གར་གནས་ཆ་མ་འཚལ།། 

ཉེར་གནས་མིག་གིས་མི་མཐོང་ཅི།། 
རིང་བར་མཆིས་ན་ཡིད་ཀྱི་གསོས།། 
འོན་ཏེ་ཉེ་ན་གནས་གང་དེ།། 
ལེགས་པར་འབྱོར་ན་ལེགས་སམ་སྙམ།། 

ད་དུང་འཁྲུན་ཐག་གཅོད་དགོས་སམ།། 
ཡང་ན་གནས་པ་འཛིན་དགོས་སམ།། 
རྨོངས་པ་རྨོངས་པར་བཏང་གྱུར་ན།། 
རང་ཡང་ཡིན་མིན་རྨོངས་པར་འགྱུར།། 

དེས་ན་ད་ལྟ་ཉིད་ལ་གནས།། 
གང་དེ་དམ་དུ་འཛིན་པར་བྱ།། 
སྲོག་གིས་གཅེས་སུ་སྲུང་བར་བྱ།། 
ཚེ་ཡི་མཐའ་ལ་སྤྱུག་པར་བྱ།། 

 ༢༠༡༣། ༠༣། ༢༡ ཉིན་གྱི་ཞོགས་པར་ཉལ་ཁང་གི་ཐོག་གར་དཔེ་ཀློག་སྐབས་ཐོལ་གྱིས་དྲན་པ་ཡི་གེ་ཕབ་པ་དགེའོ།།